திருநெல்வேலி

நெல்லை:

நெல்லை மாநகர பகுதியில் குற்றச்சம்பவங்கள் நடைபெறுவதை தடுக்கும் பொருட்டு போலீஸ் கமிஷனர் உத்தரவின்பேரில் இரவு நேரங்களில் போலீஸ் அதிகாரிகள் ரோந்து பணியில் ஈடுபட்டு வருகின்றனர்.

அதன்படி நேற்று மாநகர போலீஸ் கமிஷனர் (பொறுப்பு) மூர்த்தி மேற்பார்வையில் நெல்லை மாநகர சரகத்தில் இரவு ரோந்து பணியில் பெண் இன்ஸ்பெக்டர்கள் பணியில் ஈடுபட்டிருந்தனர்.

டவுன், சந்திப்பு, பாளை, மேலப்பாளையம் ஆகிய 4 இடங்களிலும் பெண் இன்ஸ்பெக்டர்கள் பணி செய்து கொண்டிருந்தனர். அவர்களுக்கு தலைமையாக உதவி போலீஸ் கமிஷனர் ஒருவர் பணியில் இருந்தார்.

இந்நிலையில் நேற்று இரவு 11.30 மணி அளவில் அவர் தனது ரோந்து வாகனத்தில் சந்திப்பு உடையார்பட்டி பகுதியில் உள்ள தியேட்டருக்கு சென்றுள்ளார். அங்கு புஷ்பா-2 திரைப்படம் பார்ப்பதற்காக சென்ற உதவி கமிஷனர், ஜீப்பில் காவலுக்கு டிரைவரை அமர்த்திவிட்டு சென்றுள்ளார்.

இந்த நிலையில் போலீஸ் கமிஷனர் மூர்த்தி, மைக்கில் வந்து உதவி கமிஷனரை கூப்பிட்டுள்ளார். ஆனால் சுமார் 15 நிமிடங்கள் வரையிலும் அவர் திருப்பி கமிஷனரை தொடர்பு கொள்ளவில்லை.

இதனால் கட்டுப்பாட்டு அறையில் இருந்து போலீசார், உதவி கமிஷனரின் செல்போனில் சென்று தகவல் தெரிவிக்கவே, பதறி யடித்துக்கொண்டு தியேட்டரில் இருந்து வெளியே வந்த உதவி கமிஷனர், மைக்கில் கமிஷனரை தொடர்பு கொண்டுள்ளார்.

அப்போது கமிஷனர் எங்கே இருக்கிறீர்கள் என்று கேட்டதற்கு தச்சநல்லூர் பகுதியில் ஒரு பிரச்சனை என்று சொன்னார்கள். அதனால் அங்கு நிற்கிறேன் என்று பொய் சொல்லி உள்ளார். இதனால் உண்மை நிலவரத்தை ஏற்கனவே அறிந்திருந்த கமிஷனர் மூர்த்தி, ஓபன் மைக்கில் இரவு பணி பார்க்காமல் தியேட்டரில் உட்கார்ந்து படம் பார்த்து கொண்டிருக்கிறீர்கள். மாநகரில் இன்று இரவு பணியில் முழுவதுமாக பெண் இன்ஸ்பெக்டர்கள் இருக்கும் நிலையில், நீங்கள் எந்தவித பொறுப்பும் இன்றி இப்படி செயல்படுவது நியாயமா? என்று கூறி கண்டித்துள்ளார்.

இந்த உரையாடல்கள் அனைத்தும் ஓபன் மைக்கில் நடந்ததால் மாநகரம் முழுவதும் போலீசாரிடையே இந்த சம்பவம் பேசு பொருளாக அமைந்துள்ளது.

கடந்த வாரம் இரவு பணியில் இருந்த இன்ஸ்பெக்டர் கோபால கிருஷ்ணன் மீது பெட்ரோல் குண்டு வீசி தாக்குதலுக்கு கும்பல் ஒன்று முயன்றது. இந்நிலையில் பெண் இன்ஸ்பெக்டர்கள் இரவு ரோந்து பணியில் இருந்த நேரத்தில், உதவி கமிஷனர் புஷ்பா-2 படம் பார்த்தது குறித்து துறை ரீதியாகவும் விசாரணை நடந்து வருவதாக உயர் அதிகாரிகள் தெரிவித்தனர்.

நெல்லை:

நெல்லை மாவட்டம் கூடங்குளம் ஊராட்சியில் தூய்மை பாரதம் திட்டத்தின் கீழ் மனித கழிவு மேலாண்மை திட்டம் அமைக்கப்பட உள்ளது. அதற்கான பூர்வாங்க பணிகள் நடைபெற்று வருகிறது.

இந்நிலையில் இந்த திட்டம் காற்று மாசுபாடு, நீர் மாசுபாட்டை ஏற்படுத்தும் வகையில் இருப்பதால் அதனை கைவிட வலியுறுத்தி பஞ்சாயத்து தலைவர் வின்சி மணியரசு தலைமையில் சில நாட்களுக்கு முன்பு மக்கள், கலெக்டர் கார்த்திகேயனிடம் கோரிக்கை மனு அளித்தனர். அதில், எங்கள் பஞ்சாயத்தில் சுமார் 20 ஆயிரத்துக்கும் மேற்பட்ட பொதுமக்கள் வசித்து வருகின்றனர்.

இந்த ஊராட்சியின் வடக்கு பகுதியில் கூடங்குளம் கிராம குடிநீர் ஆதாரம், அரசு மேல்நிலைப் பள்ளி, அரசு பொது மருத்துவமனை, அணுமின் நிலைய நிர்வாகம் அமைத்த அணுசங்கமம், வழிபாட்டு தலங்கள், விவசாய விளைநிலங்கள் மற்றும் பொதுமக்கள் குடியிருப்புகள் அமைந்துள்ளது.

கூடங்குளம் கிராமத்தின் பொதுமக்களின் வசதிக்காகவும், சிறுவர்களின் வசதிக்காகவும் சுமார் 1 1/2 ஏக்கரில் சிறுவர் பூங்கா அமைக்கும் பணிகள் நடந்து வருகிறது.

இந்த நிலையில் அந்த பகுதியில் சுமார் ரூ.3 கோடி மதிப்பில் தூய்மை பாரதம் திட்டத்தின் கீழ் மனித கழிவு மேலாண்மை திட்டத்தின் சுத்திகரிப்பு நிலையம் அமைக்க உள்ளதாக கூறப்படுகிறது. ஏற்கனவே அந்த பகுதி பொதுமக்கள் குடிநீர் வசதி பெறும் பகுதியாகவும் அதிகம் பேர் வசிக்கும் பகுதியாகவும் இருந்து வருகிறது.

கிராம ஊராட்சியான கூடங்குளம் பகுதியில் மனிதக் கழிவுகள் அதிக அளவு சேராத நிலையில் மாவட்டத்தில் உள்ள மாநகராட்சி, நகராட்சி, பேரூராட்சி போன்ற உள்ளாட்சி அமைப்புகளில் இருந்து சேகரிக்கப்படும் மனித கழிவுகளை கூடங்குளம் பகுதிக்கு கொண்டு வந்து சுத்திகரிப்பு செய்வதற்காக இந்த திட்டம் செயல்படுத்தப்படுகிறதோ என்ற சந்தேகம் எழுகிறது. இது முறையானது அல்ல.

இந்த திட்டம் கொண்டு வரப்பட்டால் காற்று மாசுபாடு, நீர் மாசுபாடு ஏற்படும் சூழல் உருவாகி கூடங்குளம் பகுதியில் நிலத்தடி நீர் பெருமளவு பாதிக்கப்படும்.

இதனை கருத்தில் கொண்டு மாவட்ட நிர்வாகம் மனிதக் கழிவு மேலாண்மை மையத்தை கூடங்குளம் ஊராட்சியில் அமைப்பதற்கான நடவடிக்கையை உடனடியாக கைவிட வேண்டும் என கூறியிருந்தனர்.

அதையும் மீறி ஒப்பந்தம் கோரும் பணிகள் நடந்தால் வியாபரிகள் கடையடைப்பு போராட்டம் நடத்தவும் பொதுமக்களை திரட்டி உண்ணாவிரத போராட்டம் நடத்தவும் திட்டமிட்டுள்ளதாக அவர்கள் தெரிவித்திருந்த நிலையில், இன்று அறிவித்தபடி கடையடைப்பு போராட்டம் நடைபெற்றது.

இதன் காரணமாக கூடங்குளத்தில் பஜார் பகுதிகள் வெறிச்சோடி காணப்பட்டது. அந்த பகுதி முழுவதும் உள்ள 300-க்கும் மேற்பட்ட கடைகள் அடைக்கப்பட்டுள்ளன. மேலும் தங்களது எதிர்ப்பினை தெரிவிக்கும் விதமாக பொதுமக்கள் தங்கள் வீடுகளில் கருப்பு கொடி கட்டி போராட்டம் நடத்தி வருகின்றனர். மேலும் அந்த பகுதியில் இயக்கப்படும் 60-க்கும் மேற்பட்ட ஆட்டோக்கள் ஓடவில்லை.

பணகுடி:

நெல்லை மாவட்டம் வள்ளியூரை அடுத்த சமூக ரெங்கபுரத்தை சேர்ந்தவர் நம்பி. இவரது மகன் அழகு(வயது 42). இவர் அமிர்தசரசில் இந்திய எல்லை பாதுகாப்பு படையில் போட் என்ற பிரிவில் சப்-இன்ஸ்பெக்டராக பணியாற்றி வருகிறார்.

அழகு கடந்த 2010-ம் ஆண்டு ஜம்மு காஷ்மீர் மாநிலம் ஸ்ரீநகரில் தன்னுடைய பாதுகாப்புக்காக துப்பாக்கி வாங்குவதற்கான உரிமம் பெற்றுள்ளார்.

அதன்பின் கடந்த 2019-ம் ஆண்டு மதுரையில் பெருமாள்சாமி என்பவரிடம் 32-பிஸ்டல் வகையை சார்ந்த துப்பாக்கியையும், அதற்குரிய 30 தோட்டாக்களையும் அவர் வாங்கி உள்ளார். இதில் அவர் சோதனை செய்வதற்காக 5 தோட்டாக்களை பயன்படுத்தி உள்ளார். எஞ்சிய 25 தோட்டாக்களையும் அவர் தன் வசம் வைத்திருந்தார்.

அந்த துப்பாக்கியை அவர் பணியாற்றும் இடங்களில் வைத்திருந்த நிலையில் கடந்த அக்டோபர் மாதம் 9-ந்தேதி விடுமுறைக்காக சொந்த ஊருக்கு அழகு வந்தார். பின்னர் கடந்த மாதம் 9-ந்தேதி விடுமுறை முடிந்து பணிக்காக மீண்டும் அமிர்தசரஸ் புறப்பட்டுள்ளார்.

அப்போது சமூகரெங்கபுரத்தில் குடியிருந்து வரும் அவரது பெற்றோரிடம் இது முக்கியமான பொருள் என கூறி ஒரு பெட்டியில் தன்னுடைய துப்பாக்கி, 25 தோட்டாக்கள் மற்றும் ஒரு கத்தியை உறையில் வைத்து ஒப்படைத்து விட்டு சென்றுள்ளார்.

இந்தநிலையில் சம்பவத்தன்று அழகுவின் பெற்றோர் வீட்டை பூட்டிவிட்டு தங்களது உறவினர் வீட்டிற்கு சென்று விட்டனர். தொடர்ந்து அக்கம்பக்கத்தில் வசிப்பவர்கள் அந்த வழியாக சென்றபோது அழகுவின் வீடு திறந்து கிடப்பதை பார்த்து அவரது பெற்றோருக்கு தகவல் தெரிவித்தனர்.

உடனடியாக அழகுவின் பெற்றோர் வீட்டுக்கு வந்து பார்த்தனர். அப்போது கதவுகளை உடைத்து பீரோவில் வைக்கப்பட்டிருந்த ஒரு கத்தி, துப்பாக்கி மற்றும் 25 தோட்டாக்களை காணவில்லை.

வீட்டில் யாரும் இல்லாததை அறிந்து மர்ம நபர்கள் அவற்றை திருடி சென்றுள்ளது தெரியவந்தது.

இதுபற்றி அழகுக்கு அவரது பெற்றோர் தகவல் கொடுத்தனர். அவர் உடனடியாக அமிர்தசரசில் இருந்து புறப்பட்டு இன்று காலை ராதாபுரம் வந்து சேர்ந்தார். அவர் ராதாபுரம் போலீசில் அளித்த புகாரின் அடிப்படையில் போலீசார் வழக்குப்பதிவு செய்து துப்பாக்கி, தோட்டாக்களை திருடிச்சென்ற மர்ம கும்பலை தேடி வருகின்றனர்.

இந்த சம்பவம் நேற்று அதிகாலை 2 மணியில் இருந்து 4 மணிக்குள் நடந்திருக்க வேண்டும் என்று போலீசார் சந்தேகிக்கின்றனர். நேற்று அதிகாலையில் அதே பகுதியில் 95 வயது மூதாட்டியிடம் கம்மலை பறித்துச்சென்ற அதே கும்பல் தான் இந்த திருட்டு சம்பவத்தில் ஈடுபட்டிருக்க வேண்டும் என்ற கோணத்தில் போலீசார் தீவிர விசாரணை மேற்கொண்டு வருகின்றனர். 

நெல்லை:

கள்ளக்குறிச்சி மாவட்டம் ரிஷிவந்தியம் அருகே உள்ள முனிவாழை கிராமத்தை சேர்ந்தவர் ஏழுமலை. இவரது மகன் விஜயகுமார் (வயது 25). இவர் தர்மபுரி மாவட்டத்தில் உள்ள ஒரு சிமெண்டு கம்பெனியில் வேலை பார்த்து வந்தார்.

இவருக்கும், நெல்லை பாளையங்கோட்டை சாந்திநகர் 24-வது தெருவை சேர்ந்த ஞானராஜ் மகள் ஜெனிபர் (23) என்பவருக்கும் இன்ஸ்டாகிராம் மூலம் பழக்கம் ஏற்பட்டு காதலாக மாறியுள்ளது. இதனை அறிந்த ஜெனிபரின் சகோதரர் சிம்சன் என்ற புஷ்பராஜ் செல்போனில் பேசி விஜயகுமாரை நெல்லைக்கு வரவழைத்துள்ளார்.

நேற்று காலை ரெயிலில் நெல்லைக்கு வந்த விஜயகுமாரை சிம்சன் தனது நண்பரான பாளை அண்ணா நகரை சேர்ந்த சிவாவுடன் (35) சேர்ந்து அவரது வீட்டுக்கு அழைத்துச்சென்று அங்கு வைத்து கொலை செய்தார்.

இதுகுறித்து பாளை போலீசார் வழக்குப்பதிவு செய்து சிம்சனையும், சிவாவையும் கைது செய்து நடத்திய விசாரணையில் சிம்சன் கூறியதாவது:-

எனது தங்கையை நான் கஷ்டப்பட்டு வளர்த்து என்ஜினீயரிங் படிக்க வைத்தேன். பின்னர் அவர் நாகர்கோவிலில் வேலை பார்த்து வந்தார். அப்போது இன்ஸ்டாகிராம் மூலம் விஜயகுமாருடன் அவருக்கு காதல் ஏற்பட்டது. இதனை அறிந்து நாங்கள் அவரை வேலைக்கு செல்ல வேண்டாம் என்று கூறிவிட்டோம். இதனால் சமீபத்தில் ஜெனிபர் கள்ளக்குறிச்சியில் விஜயகுமாரை தேடி சென்றுவிட்டார்.

இதுகுறித்து பாளை மகளிர் போலீசில் சமாதானம் பேசி மீண்டும் ஜெனிபரை எங்கள் வீட்டுக்கு அழைத்து வந்துவிட்டோம். ஆனாலும் எனது தங்கை கடந்த சில நாட்களுக்கு முன்பு தற்கொலைக்கு முயன்றார். இதனால் எனக்கு மனவேதனை ஏற்பட்டது. எனது தங்கையை இவ்வளவு கஷ்டபடுத்தும் விஜயகுமாரை கண்டிக்க வேண்டும் என்று நினைத்து அவரை நைசாக பேசி நெல்லைக்கு வரவழைத்தேன்.

ஆனால் அவர் முன் எச்சரிக்கையாக அவரது நண்பர் ஒருவரை அழைத்து வந்திருந்தார். இதனால் அவரை நம்பும்படி பேசி கழட்டிவிட்டுவிட்டு விஜயகுமாரை மட்டும் அழைத்து வந்தேன். எனது நண்பன் சிவா வீட்டில் வைத்து சமாதானம் பேசினோம். அப்போது அவர் எங்களது சமாதானத்தை கேட்கவில்லை. காதலை கைவிட மறுத்தார். இதனால் நான் அவரை தாக்கினேன். ஆத்திரம் அதிகரித்ததில் நாங்கள் 2 பேரும் சேர்ந்து விஜயகுமாரை கொலை செய்தோம்.

இவ்வாறு அவர் கூறினார்.

இதையடுத்து 2 பேரையும் போலீசார் கைது செய்து சிறையில் அடைத்தனர். இதனிடையே விஜயகுமார் உடல் பிரேத பரிசோதனைக்கு பின்னர் இன்று காலை அவரது பெற்றோரிடம் ஒப்படைக்கப்பட்டது.

நெல்லை:

நெல்லை பாளையங்கோட்டை சாந்திநகர் 18-வது தெருவில் அண்ணாநகர் கீழத்தெருவில் உள்ள ஒரு வீட்டின் மாடியில் இருந்து இன்று காலை பயங்கர அலறல் சத்தம் கேட்டது.

உடனே அப்பகுதி மக்கள் அங்கு ஓடிச் சென்றனர். அப்போது வீட்டில் இருந்து 2 பேர் கீழே இறங்கி தப்பி ஓடினர். உள்ளே சென்று பார்த்த போது அங்கு வாலிபர் ஒருவர் வெட்டிக்கொலை செய்யப்பட்டு ரத்த வெள்ளத்தில் கிடந்தார்.

இதைப்பார்த்து அதிர்ச்சி அடைந்த பொதுமக்கள் பாளையங்கோட்டை போலீசாருக்கு தகவல் தெரிவித்தனர். உடனே இன்ஸ்பெக்டர் தில்லை நாகராஜன் தலைமையிலான போலீசார் அங்கு விரைந்து சென்றனர்.

அப்போது வீட்டின் மாடியில் உள்ள கூரை செட்டுக்குள் 25 வயது மதிக்கத்தக்க வாலிபர் கொலை செய்யப்பட்டு கிடந்தார். அவரது உடலை மீட்டு நெல்லை அரசு மருத்துவமனைக்கு பிரேத பரிசோதனைக்காக அனுப்பி வைத்தனர். உடனடியாக கைரேகை நிபுணர்கள், மோப்ப நாய் வரவழைக்கப்பட்டு ஆய்வு செய்தனர்.

தொடர்ந்து நடந்த விசாரணையில் கொலை செய்யப்பட்ட வாலிபர் கள்ளக்குறிச்சி மாவட்டத்தை சேர்ந்த விஜய் (வயது 25) என்பதும், அவரை சாந்திநகர், அண்ணாநகரை சேர்ந்த சிம்சோன் என்ற புஷ்பராஜ், அவரது நண்பரான சிவா ஆகியோர் சேர்ந்து வெட்டிக் கொலை செய்ததும் தெரிய வந்தது.

இதையடுத்து அவர்கள் 2 பேரையும் போலீசார் பிடித்து விசாரணை நடத்தினர். இதில் காதல் விவகாரத்தில் விஜய் கொலை செய்யப்பட்டது தெரிய வந்தது.

புஷ்பராஜின் சகோதரி ஒருவர் என்ஜினீயரிங் படித்து முடித்துள்ளார். நாகர்கோவிலில் உள்ள தனியார் நிறுவனத்தில் பணியாற்றி வரும் அவருக்கு இன்ஸ்டாகிராம் மூலம் விஜயுடன் பழக்கம் ஏற்பட்டுள்ளது.

விஜய் தர்மபுரி மாவட்டம் பாப்பிரெட்டிபட்டியில் உள்ள தனியார் நிறுவனத்தில் வேலை பார்த்து வந்தார். விஜயுடனான பழக்கம் நாளடைவில் காதலாக மாறி உள்ளது.

இந்த காதல் விவகாரம் பெண்ணின் குடும்பத்தினருக்கு தெரிய வந்ததும் அவர்கள் காதலுக்கு எதிர்ப்பு தெரிவித்தனர். இதனால் அந்த பெண் கடந்த சில நாட்களுக்கு முன்பு காதலன் விஜயை பார்ப்பதற்காக கள்ளக்குறிச்சிக்கு சென்றார். அங்கு விஜயின் குடும்பத்தினரிடம் திருமணம் செய்வதற்காக சம்மதம் கேட்டுள்ளார்.

அப்போது விஜயின் குடும்பத்தினர் இருவீட்டார் சம்மதத்துடன் தான் திருமணம் நடைபெற வேண்டும் கூறி அந்த பெண்ணை மீண்டும் நெல்லைக்கு அனுப்பி வைத்தனர்.

இதனால் மனம் உடைந்த அந்த பெண் கடந்த 4 நாட்களுக்கு முன்பு விஷம் குடித்து தற்கொலைக்கு முயன்றார். குடும்பத்தினர் அவரை காப்பாற்றி அறிவுரை கூறினர்.

இந்நிலையில் தனது சகோதரியின் இந்த முடிவுக்கு விஜய் தான் காரணம் என கருதிய அவரது அண்ணன் புஷ்பராஜ் விஜயை தீர்த்துக்கட்ட முடிவு செய்துள்ளார்.

அதன்படி விஜயிடம் சமாதானம் பேசலாம் எனக்கூறி நெல்லைக்கு வருமாறு அழைத்துள்ளார். அதனை நம்பிய விஜய் இன்று காலை ரெயில் மூலம் நெல்லை வந்துள்ளார்.

நெல்லை ரெயில் நிலையத்தில் இருந்து விஜயை புஷ்பராஜ் தனது நண்பரான சிவா வீட்டிற்கு அழைத்து சென்றுள்ளார்.

அங்கு வீட்டின் மாடியில் சமாதானம் பேசிய போது விஜய்க்கும், புஷ்பராஜூக்கும் இடையே வாக்குவாதம் ஏற்பட்டுள்ளது. அப்போது ஆவேசம் அடைந்த புஷ்பராஜ், சிவா ஆகிய இருவரும் தாங்கள் மறைத்து வைத்திருந்த அரிவாளால் விஜயை வெட்டினர்.

மேலும் அங்கு கிடந்த கட்டிட கழிவுகள் மூலமும் விஜயை தாக்கியதில் அவர் சம்பவ இடத்திலேயே ரத்த வெள்ளத்தில் பலியானது தெரியவந்தது. இதைத் தொடர்ந்து புஷ்பராஜ், சிவா ஆகிய இருவரையும் போலீசார் கைது செய்து தீவிர விசாரணை நடத்தி வருகின்றனர்.

காதல் விவகாரத்தில் வாலிபர் வெட்டிக் கொலை செய்யப்பட்ட இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.

நெல்லை, நவ. 30-

தென்னக ரெயில்வேயின் மதுரை கோட்டத்தில் ரெயில் பயணிகள் நலச் சங்கத்தினர் கோரிக்கையை ஏற்று கோடை விடுமுறை மற்றும் பண்டிகை கால கட்டங்களில் தென் மாவட்டங்களுக்கு ஏராள மான சிறப்பு ரெயில்கள் இயக்கப்பட்டு வருகிறது.

அந்த வகையில் நெல்லை-மேட்டுப்பாளையம் இடையே ஞாயிற்றுக்கிழமை தோறும் இயக்கப்படும் வண்டி எண். 06030 வாராந்திர சிறப்பு ரெயில் நெல்லையில் இருந்து மாலை 7 மணிக்கு புறப்பட்டு மறுநாள் காலை 7.30 மணிக்கு மேட்டுப்பாளை யத்தை சென்றடைகிறது.

இதே போல மேட்டுப் பாளையம்-நெல்லை இடையே திங்கட்கிழமை தோறும் இயக்கப்படும் வாராந்திர சிறப்பு ரெயில் வண்டி எண். 06029 மேட்டுப்பாளையத்தில் இருந்து மாலை 7.45 மணிக்கு புறப்பட்டு மறுநாள் காலை 7.45 மணிக்கு நெல்லையை சென்றடையும்.

அம்பை, தென்காசி, சிவகாசி, மதுரை, பழனி, பொள்ளாச்சி, கோவை வழியாக இயக்கப்படும் இந்த ரெயிலை மேலும் 2 மாதங்களுக்கு நீட்டித்து ரெயில்வே நிர்வாகம் அறிவித்துள்ளது. இதற்கான முன்பதிவு இன்று காலை முதல் தொடங்கியது.

இதேபோல் நெல்லை-சென்னை எழும்பூர் இடையே விருதுநகர், காரைக்குடி, பட்டுக்கோட்டை, திருவாரூர், விழுப்புரம் , தாம்பரம் வழியாக இயக்கப்படும் சிறப்பு ரெயில் (வண்டி எண்: 06070-06069) மேலும் 2 மாதங்கள் நீட்டிக்கப்பட்டு உள்ளது.

தாம்பரம்-நாகர்கோவில் இடையே வள்ளியூர், நெல்லை, விருதுநகர், மதுரை, திண்டுக்கல்,திருச்சி, விழுப்புரம் வழியாக இயக்கப்பட்டு வரும் சிறப்பு ரெயில் (வண்டி எண் 06012-06013) மேலும் 2 மாதங்களுக்கு நீட்டிக்கப்பட்டுள்ளது.

இந்த ரெயில்களுக்கும் இன்று முதல் முன்பதிவு தொடங்கி உள்ளது. இந்த ரெயில்கள் நீட்டிப்பு மூலம் கிறிஸ்துமஸ், பொங்கல் பண்டிகைகளுக்கு சொந்த ஊருக்கு வந்து செல்லும் தென்மாவட்ட பயணிகள் மகிழ்ச்சி அடைந்துள்ளனர்.

நெல்லை:

நெல்லை மாவட்ட கலெக்டர் அலுவலகத்திற்கு இன்று 2 பெண்கள் உட்பட 4 பேர் மனு அளிப்பதற்காக வந்தனர். அவர்கள் கலெக்டர் அலுவலக நுழைவு வாயிலில் உள்ளே நுழைந்தவுடன் திடீரென மறைத்து வைத்திருந்த பாட்டிலை எடுத்து அதிலிருந்து மண்எண்ணையை தலையில் ஊற்றி தீக்குளிக்க முயற்சி செய்தனர்.

இதை அங்கு பாதுகாப்புக்கு நின்று கொண்டிருந்த போலீசார் பார்த்து அதிர்ச்சி அடைந்தனர். உடனே அவர்கள் விரைந்து சென்று தீக்குளிக்க முயன்றவர்களிடம் இருந்து மண்எண்ணை பாட்டில் மற்றும் தீப்பெட்டியை பறித்து விட்டு அவர்கள் மீது தண்ணீரை ஊற்றினர். தொடர்ந்து அவர்களிடம் விசாரித்தனர். அதன் விபரம் வருமாறு:-

நெல்லையை அடுத்த தாழையூத்து பகுதியை சேர்ந்தவர் நயினார் முகமது. இவர் தாழையூத்து பகுதியில் உள்ள ஒரு பழைய தியேட்டரை வாங்குவதற்காக ரூ. 45 லட்சத்திற்கு ஒப்பந்தம் போட்டுள்ளதாகவும், அந்த தியேட்டர் அருகே இருந்த இடத்தை வாங்கிய அரசியல் கட்சி பிரமுகர் ஒருவர், நயினார் முகமது ஒப்பந்தம் செய்திருந்த தியேட்டர் இடத்தையும் அபகரிக்க முயன்றதாக கூறப்படுகிறது.

இதையடுத்து நயினார் முகமது கோர்ட்டில் வழக்கு தொடர்ந்தார். இந்த வழக்கு கோர்ட்டில் நடைபெற்று வரும் நிலையில் தற்காலிகமாக அந்த இடத்திற்கு இரு தரப்பினரும் சொந்தம் கொண்டாட முடியாது என்றும், மேற்கொண்டு அந்த இடத்தில் பணிகள் எதுவும் நடத்தக்கூடாது எனவும் உத்தரவு பிறப்பித்துள்ளனர்.

இந்த நிலையில் இன்று காலை ஒரு கும்பல் அந்த தியேட்டர் வளாகத்துக்கு சென்று பணிகளை மேற்கொண்டுள்ளனர். இதனால் அதிர்ச்சி அடைந்த நயினார் முகமது, தனது மகள் ஜன்னத், மருமகள் அலிமா பேகம் மற்றும் ஒரு உறவினருடன் நெல்லை மாவட்ட போலீஸ் சூப்பிரண்டு அலுவலகத்திற்கு வந்து இது தொடர்பாக புகார் மனு ஒன்று அளித்துள்ளார்.

பின்னர் கலெக்டர் அலுவலகத்தில் அவர் முறையிட வந்த நிலையில் தீக்குளித்து தற்கொலைக்கு முயற்சி செய்தது விசாரணையில் தெரியவந்தது. இதையடுத்து 4 பேரையும் போலீசார் பாளை போலீஸ் நிலையத்திற்கு அழைத்துச் சென்று விசாரித்து வருகின்றனர்.

தூத்துக்குடி:

தென்மேற்கு வங்கக் கடலில் உருவாகியுள்ள ஆழ்ந்த காற்றழுத்த தாழ்வு மண்டலம், காரைக்கால்-மாமல்லபுரம் இடையே நாளை கரையை கடக்கும் என இந்திய வானிலை ஆய்வு மையம் தெரிவித்துள்ளது. இதனால் மணிக்கு 50 முதல் 60 கிலோ மீட்டர் வேகத்திற்கு காற்று வீசும் எனவும் தெரிவிக்கப்பட்டுள்ளது.

இதன் காரணமாக கடந்த 3 நாட்களாக நெல்லை, தூத்துக்குடி மாவட்டங்களில் மீனவர்கள் கடலுக்கு செல்லவில்லை.

இன்று 4-வது நாளாக மீனவர்கள் கடலுக்கு செல்லாத காரணத்தினால் படகுகள் கரைகளில் நிறுத்தி வைக்கப்பட்டுள்ளது.

தூத்துக்குடி மாவட்டம் முழுவதும் 600 விசைப்படகுகள் மற்றும் 4 ஆயிரத்து 400 நாட்டு படகுகள் கரையில் நிறுத்தி வைக்கப்பட்டுள்ளது. நெல்லை மாவட்டத்தில் உள்ள கூட்டப்புளி, பெருமணல், இடிந்தகரை, கூத்தன்குழி, உவரி, கூடுதாழை உள்ளிட்ட 9 மீனவ கிராமங்களை சேர்ந்த சுமார் 8 ஆயிரம் நாட்டு படகு மீனவர்கள் இன்று 4-வது நாளாக நாளாக கடலுக்கு மீன் பிடிக்க செல்லவில்லை. இதனால் சுமார் 1500-க்கும் மேற்பட்ட நாட்டு படகுகள் கடற்கரையோரத்தில் நிறுத்தி வைக்கப்பட்டுள்ளன.

நெல்லை:

நெல்லை, தென்காசி, தூத்துக்குடி மாவட்டங்களில் நேற்று மாலையில் தொடங்கி இன்று காலை வரையிலும் அனைத்து இடங்களிலும் பரவலாக மழை பெய்த வண்ணம் உள்ளது.

நெல்லை மாவட்டத்தில் நேற்று இரவு முழுவதும் சாரல் மழை பெய்ததை தொடர்ந்து இன்று காலையிலும் மழை விடாமல் பெய்து வருகிறது. இதனால் பொதுமக்களின் இயல்பு வாழ்க்கை பாதிக்கப்பட்டுள்ளது.

மாவட்டத்தில் அம்பை, சேரன்மகாதேவி, நாங்குநேரி, ராதாபுரம், களக்காடு, மூலைக்கரைப் பட்டி மற்றும் அதன் சுற்றுவட்டார பகுதிகளில் தொடர்ந்து மழை பெய்து வருகிறது. இதன் காரணமாக தாழ்வான இடங்களில் தண்ணீர் தேங்கி கிடக்கிறது.

காலையிலும் பெய்து வரும் மழை காரணமாக பள்ளிகளுக்கு செல்லும் மாணவ-மாணவிகள் மிகுந்த சிரமம் அடைந்து வருகின்றனர். பணிக்கு செல்லும் பெண்கள், வாகன ஓட்டிகள் என பலதரப் பட்டவர்களும் மிகுந்த அவதி அடைந்தனர்.

அதிகபட்சமாக களக்காடு மற்றும் அதன் சுற்றுவட்டார பகுதிகளில் 9.20 மில்லி மீட்டரும், அம்பையில் 8 மில்லி மீட்டரும், நாங்குநேரி, சேரன்மகாதேவி, மூலைக் கரைப்பட்டி பகுதிகளில் தலா 7 மில்லி மீட்டரும் மழை பதிவாகி உள்ளது.

மாநகரில் டவுன், பேட்டை, சந்திப்பு, தச்சநல்லூர், வண்ணார்பேட்டை, சமாதானபுரம், பாளை உள்ளிட்ட பகுதிகளில் நேற்று மாலையில் தொடங்கி இரவு முழுவதும் பரவலாக மழை பெய்தது. இன்றும் காலை மீண்டும் மழை தொடர்ந்து வருகிறது.

தொடர் மழை காரணமாக களக்காடு தலையணையில் இன்று 9-வது நாளாக குளிக்க தடை விதிக்கப்பட்டுள்ளது. மணிமுத்தாறு அருவியில் நீர்வரத்து அதிகரித்துள்ளது.

தென்காசி மாவட்டத்தை பொறுத்தவரை மேற்கு தொடர்ச்சி மலையில் அமைந்துள்ள கடனா அணையின் நீர் பிடிப்பு பகுதியில் 14 மில்லி மீட்டரும், ராமநதி அணை பகுதியில் 12 மில்லி மீட்டரும், குண்டாறு அணையில் 15 மில்லி மீட்டரும், கருப்பா நதி அணையில் 11.5 மில்லி மீட்டரும் மழை பெய்தது.

மாவட்டத்தில் தென்காசி, செங்கோட்டை, ஆய்க்குடி, சங்கரன்கோவில், சிவகிரி மற்றும் அதன் சுற்றுவட்டார பகுதிகளில் பரவலாக மழை பெய்தது. ஆலங்குளம் மற்றும் அதன் சுற்றுவட்டார பகுதிகளில் நேற்று இரவு முதல் இன்று காலை வரையிலும் லேசான சாரல் மழை தொடர்ச்சியாக பெய்து வருகிறது.

அதிகபட்சமாக செங்கோட்டையில் 17 மில்லி மீட்டர் மழை பதிவாகி உள்ளது.தென்காசியில் 10 மில்லி மீட்டர் மழை பெய்துள்ளது. காலையில் தொடரும் மழை காரணமாக பள்ளிக்கு செல்லும் மாணவ-மாணவிகளும், பணிக்கு செல்பவர்களும் மிகுந்த அவதி அடைந்தனர்.

தூத்துக்குடி மாவட்டத்தில் மாநகர பகுதியில் கனமழை கொட்டி தீர்த்தது. தாழ்வான இடங்களில் மழை நீர் குளம் போல தேங்கியது. அங்கு அதிகபட்சமாக 21 மில்லி மீட்டர் மழை பதிவாகி உள்ளது.

மாவட்டத்தை பொறுத்த வரை கடம்பூர், காடல்குடி, வைப்பார், சூரங்குடி ஆகிய இடங்களில் கனமழை இரவு முழுவதும் பெய்தது. இதனால் சாலைகளில் வெள்ளம் பெருக்கெடுத்து ஓடியது. சூரங்குடி 34 மில்லி மீட்டர் மழை பதிவாகி உள்ளது.

கழுகுமலை, கோவில்பட்டி, எட்டயபுரம், விளாத்திகுளம் பகுதிகளிலும் விடிய விடிய சாரல் மழை பெய்தது. திருச்செந்தூர், சாத்தான்குளம், காயல்பட்டினம், குலசேகரன்பட்டினம், ஸ்ரீவைகுண்டம் உள்ளிட்ட இடங்களிலும் சாரல் அடித்தது. இதனால் பொதுமக்களின் இயல்பு வாழ்க்கை பெரிதும் பாதிக்கப்பட்டது.

திருநெல்வேலி:

திருநெல்வேலி மாவட்டம் சுத்தமல்லி அருகே இந்திரா காலனியை சேர்ந்தவர் அழகுமுத்து இவரது மகன் முத்துகிருஷ்ணன் 21 வயது வாலிபரான இவர் அங்குள்ள அலுமினியம் தொழிற்சாலையில் பணியாற்றி வந்துள்ளார்.

அப்பகுதியில் உள்ள கல்வெட்டான்குழி அருகே நண்பர்களுடன் மாலையில் பேசிக் கொண்டிருந்ததாக தெரிகிறது. இந்த நிலையில் மாலை நேரத்தில் அப்பகுதிக்கு இருசக்கர வாகனத்தில் வந்த மர்ம கும்பல் நண்பர்களை அங்கிருந்து விரட்டி விட்டு முத்துகிருஷ்ணனை முகம் கழுத்து உள்ளிட்ட இடங்களில் வெட்டி படுகொலை செய்து விட்டு அங்கிருந்து தப்பி ஓடிவிட்டனர்.

வாலிபர் வெட்டி படுகொலை செய்யப்பட்ட சம்பவம் குறித்து போலீசார் விசாரணை நடத்தி வருகின்றனர்.

'ஈஷா மண் காப்போம்' இயக்கம் சார்பில் 'வாழ வைக்கும் வாழை' எனும் பிரம்மாண்ட பயிற்சி கருத்தரங்கு திருநெல்வேலி மாவட்டம் சேரன்மகாதேவியில் உள்ள ஸ்காட் கல்லூரியில் நடைப்பெற்றது.

இதில் சிறப்பு விருந்தினராக கலந்து கொண்ட ICAR-NRCB இயக்குனர் செல்வராஜன், "சத்குரு உலகமெங்கும் பயணித்து, மண் காப்போம், மண் நமது உயிர் என ஐ.நா அமைப்புகள் மற்றும் பல்வேறு உலக நாடுகளில் மண் வளம் காக்கப்பட வேண்டியதன் அவசியம் குறித்துப் பேசி விழிப்புணர்வை ஏற்படுத்தி உள்ளார்" என பாராட்டினார்.

இத்திருவிழாவின் நோக்கம் குறித்து மண் காப்போம் இயக்கத்தின் திட்ட ஒருங்கிணைப்பாளர் சுவாமி ஶ்ரீமுகா பேசுகையில், "திருநெல்வேலி மற்றும் அதன் சுற்று வட்டாரப் பகுதிகளில் வாழை விவசாயம் பிரதானமாக இருக்கிறது. பல விவசாயிகள் வாழை விவசாயம் என்பது வாழை சாகுபடியோடு நின்று விடுவதாக நினைக்கிறார்கள்.

ஆனால் வாழையில் அதன் அனைத்து பாகங்களையும் மதிப்பு கூட்ட முடியும். இவ்வாறு மதிப்பு கூட்டுவதன் மூலம் சிறு விவசாயிகள் கூட தொழில் முனைவோர்கள் ஆக முடியும். எனவே அது குறித்த உத்திகளை, தொழில்நுட்பங்களை விவசாயிகளுக்கு விளக்கும் நோக்கில் இந்நிகழ்ச்சி நடத்தப்படுகிறது" என பேசினார்.

இவ்விழாவில் தேசிய வாழை ஆராய்ச்சி மையத்தின் இயக்குனர் செல்வராஜன் பேசுகையில், "ஈஷாவால் நடத்தப்படும் நிகழ்ச்சிகளில் பங்கேற்கும் விவசாயிகள் கற்றுக் கொள்ள வேண்டும் என்கிற ஆர்வத்தோடு பங்கேற்கின்றனர். இது போன்ற விவசாயிகளை ஒருங்கிணைத்து பயிற்சி கருத்தரங்குகளை நடத்துவதற்கு ஈஷாவிற்கு நன்றி.

இந்தியா வாழை உற்பத்தியில் உலகில் முதலிடம் வகிக்கிறது. நாம் 10 லட்சம் ஹெக்டேர் வாழை சாகுபடி செய்து 37 மில்லியன் டன் உற்பத்தி செய்கிறோம். ஆனால் 3 லட்சம் டன் மட்டுமே ஏற்றுமதி செய்கிறோம்.

மேலும் ஒரு ஏக்கர் பூவன் வாழை தண்டிலிருந்து 20,000 லிட்டர் ஜூஸ் எடுக்கலாம். 200 மில்லி ஜூஸை ரூ.25 விற்கிறோம். 20,000 லிட்டரில் 25 லட்சம் வரை வருமானம் எடுக்க முடியும் இது 6 மாதம் வரை கெட்டுப்போகாது.

மேலும் சிறுநீரக கல்லை குறைக்க இந்த ஜூஸ் உதவுகிறது. இது போல வாழை பூ, வாழை காய் என அனைத்தையும் மதிப்பு கூட்டலாம்" எனப் பேசினார்.

அவரைத் தொடர்ந்து பேசிய முன்னோடி விவசாயி திருமதி. சியாமளா குணசேகரன், 'எந்தவொரு தொழில் செய்பவரும் தான் உற்பத்தி செய்வதை குறைந்த விலைக்கு விற்பதில்லை.

ஆனால் விவாசயிகள் மட்டுமே தங்கள் கண் முன்பே தங்கள் உற்பத்தியை குறைந்த விலைக்கு விற்கும் சூழல் உள்ளது. இதிலிருந்து வெளி வர வேண்டும் என நினைத்தேன்.

வாழை சார் பொருட்களை மதிப்பு கூட்டி விற்பனை செய்ய தொடங்கினேன். நம் தோட்டத்தில் பணம் கொட்டிக் கிடக்கிறது. பண்ணையில் கிடைக்கும் அருகம்புல் எடுத்து ஜூஸ் போட்டு கொடுத்தால் காசு, குப்பை மேனியை சோப் செய்து கொடுத்தால் காசு, ஒரு காலத்தில் என் தோட்டத்தில் தேங்காய் மரங்களை வெறும் ரூ.5000-த்திற்கு குத்தகை கொடுத்தேன். ஆனால் இப்போது ஒரு லிட்டர் தேங்காய் எண்ணெய் எடுத்து ஒரு கிலோ சோப் செய்கிறோம் அதை ரூ.800-க்கு கொடுக்கிறோம்.' எனப் பேசினார்.

மேலும் வாழை சார் தொழில் முனைவோர்களான எஸ்.கே. பாபு, ராஜா, அஜிதன், ஜமின் பிரபு மற்றும் முன்னோடி விவசாயி சண்முகசுந்தரம் உள்ளிட்டோர் கலந்து கொண்டு தங்கள் அனுபவங்களை பகிர்ந்து கொண்டனர்.

மேலும் இவர்களோடு திருச்சி தேசிய வாழை ஆராய்ச்சி மையத்தின் விஞ்ஞானிகளான கற்பகம், சுரேஷ்குமார், ஜெயபாஸ்கரன் மற்றும் ஜி. பிரபு ஆகியோர் பங்கேற்று தேசிய வாழை ஆராய்ச்சி மையத்தின் சேவைகள், அரசு திட்டங்கள், வாழை ரகங்கள், அறுவடை பின்சார் தொழில்நுட்பங்கள், மதிப்புகூட்டப்பட்ட பொருட்களுக்கு வாழை சார் ஏற்றுமதி வாய்ப்புகள் உள்ளிட்டவற்றை குறித்து பேசினர்.

இந்த கருத்தரங்கின் முக்கிய நிகழ்வுகளாக வாழையில் மதிப்பு கூட்டப்பட்ட 50-க்கும் மேற்பட்ட உணவு பொருட்கள் மற்றும் வாழை நாரால் ஆன 150-க்கும் மேற்பட்ட கைவினை பொருட்கள் விற்பனைக்கும் கண்காட்சிக்கும் வைக்கப்பட்டன.

மேலும் இயற்கை விவசாயத்தின் மூலம் விளைவிக்கப்பட்ட சிறுதானிய திண்பண்டங்கள் உள்ளிட்டவை விற்பனைக்கு வைக்கப்பட்டது.

வாழை விவசாயிகளுக்கும் வாழை சார் தொழில் முனைவோர்களுக்கும் 'சிறந்த வாழை விவசாயி' விருதுகள் வழங்கப்பட்டன.

'ஈஷா மண் காப்போம்' இயக்கம் கடந்த 15 வருடங்களாக நம் மண்ணின் வளத்தை மேம்படுத்தும் நோக்கத்தோடு தமிழகம் முழுவதும் இயற்கை விவசாயத்தை முன்னெடுத்து விவசாய பயிற்சி வகுப்புகளை நடத்தி வருகிறது.

இவ்வியக்கம் மூலம் இதுவரை 30,000-க்கும் மேற்பட்ட விவசாயிகளுக்கு பயிற்சி அளிக்கப்பட்டுள்ளது குறிப்பிடத்தக்கது.

நெல்லை:

தென்காசி மாவட்டம் செங்கோட்டையில் இருந்து தென்காசி, சங்கரன்கோவில் வழியாக சிலம்பு எக்ஸ்பிரஸ் ரெயில் (வண்டி எண் 20681-20682) சென்னை தாம்பரத்திற்கு இயக்கப்பட்டு வருகிறது.

17 பெட்டிகளுடன் சிலம்பு எக்ஸ்பிரஸ் ரெயில் இயங்கி வந்த நிலையில் அதில் கூடுதல் பெட்டிகள் இணைக்க வேண்டும் என்று பயணிகள் கோரிக்கை விடுத்து வந்தனர்.

இந்நிலையில் கூடுதலாக ஒரு இரண்டடுக்கு ஏசி பெட்டியும், 2 மூன்றடுக்கு ஏசி பெட்டியும், 2 தூங்கும் வசதி பெட்டியும், ஒரு முன்பதிவு இல்லாத பொது பெட்டியும் இணைக்க தென்னக ரெயில்வே உத்தரவு வழங்கி உள்ளது.

வருகிற 27-ந்தேதி முதல் அடுத்த ஆண்டு ஜனவரி 30-ந்தேதி வரை இந்த கூடுதல் பெட்டிகளுடன் ரெயில் இயங்கும் என தெரிவிக்கப்பட்டுள்ளது.

ஏற்கனவே 17 பெட்டிகளுடன் இயங்கி வந்த நிலையில் தற்போது கூடுதலாக 6 பெட்டிகள் இணைக்கப்பட்டு 23 பெட்டிகளுடன் இயங்க இருக்கிறது. இதனால் கூடுதலாக 500 பேர் வரை பயணம் செய்ய முடியும். இதனால் பயணிகள் மகிழ்ச்சி அடைந்துள்ளனர்.