பெண்கள் உலகம்

புற்றுநோய் என்பது இப்போது பரவலாகவே அதிகரித்து வருகிறது. புற்றுநோயை பொருத்தவரை என்றைக்குமே வருமுன் காப்பது என்பது தான் நல்லது. வந்த பிறகு தீர்ப்பது என்பது கவலை தரக்கூடிய விஷயமாகி விடும்.

புற்றுநோயை வருமுன் காப்பதற்கு என்ன செய்ய வேண்டும் என்ற கேள்வி எல்லோர் மனதிலும் எழுகிறது. புற்றுநோய் என்ன காரணத்தினால் வரும் என்பது தெரிந்தால் தான் நாம் அதை தவிர்க்க முடியும்.

பெண்களுக்கு ஏற்படும் கர்ப்பவாய் புற்றுநோயை தடுப்பதற்கு தடுப்பூசி வந்து விட்டது. அதேபோல் இன்னும் சிலவகையான புற்றுநோயை தடுப்பதற்கும் தடுப்பூசி உள்ளது. ஆனால் பெண்களை அதிகமாக பாதிக்கின்ற ஒரு புற்றுநோய் மார்பக புற்றுநோய் தான்.

இந்த மார்பக புற்றுநோயை தடுப்பதற்கான வழிமுறைகளை அறிய இன்று பலரும் இதை ஒரு ஆய்வாக எடுத்து செய்துகொண்டிருக்கிறார்கள்.

உலக அளவில் பெண்களை அதிகம் பாதிக்கின்ற புற்றுநோயில் மார்பக புற்றுநோய் முதலிடத்தில் உள்ளது. உலக அளவில் கொடுக்கப்பட்டுள்ள தரவுகளின் படி ஒரு வருட காலத்தில் 21 லட்சம் பேருக்கு மார்பக புற்றுநோய் வருகிறது. இவற்றில் கிட்டத்தட்ட 6 லட்சம் பேர் புற்றுநோயால் இறப்பது தான் எல்லோருக்கும் அதிர்ச்சி தரக்கூடிய தகவல்.

நமது நாட்டில் மட்டுமே கிட்டத்தட்ட 3 லட்சம் பேர் புதிய புற்றுநோயாளிகளாக உருவாகிக் கொண்டிருக்கிறார்கள். இதில் 60 சதவீதம் பேருக்கு கடைசி நேரத்தில் தான் புற்றுநோய் கண்டுபிடிக்கப்படுகிறது என்பது வருந்தத்தக்க விஷயம்.

இந்த மார்பக புற்றுநோயின் முக்கியமான விஷயமே ஆரம்ப நிலையில் கண்டுபிடித்தால் அதை முழுமையாக சரிப்படுத்த முடியும். வாழ்நாள் முழுவதும் நல்ல முறையில் வாழவும் முடியும்.

மார்பக புற்றுநோய் வருவதற்கான காரணங்கள் என்ன?

பெண்களுக்கு மார்பக புற்றுநோய் வருவதற்கு பல காரணங்களை சொல்லி இருக்கிறார்கள். அந்த காரணங்களை தெரிந்து கொள்ளும் நிலையில் மார்பக புற்று நோய் வராமல் தடுக்கும் முறைகளை கடைபிடிக்க முடியும்.

மரபுவழியாக:

முக்கியமாக உங்கள் குடும்பங்களில் அம்மா, பாட்டி, சித்தி, அத்தை உள்ளிட்ட நெருங்கிய ரத்த சொந்தங்கள் யாருக்காவது ஏதாவது ஒரு வகை புற்றுநோய் வந்திருந்தாலோ அல்லது மார்பக புற்றுநோயோ, கர்ப்பவாய் புற்றுநோயோ வந்திருந்தால் கண்டிப்பாக அது உங்களுக்கும் வருவதற்கான வாய்ப்புகள் அதிகம்.

எனவே மரபு ரீதியாக மார்பக புற்றுநோய் மரபணு 1 (ப்ராக்கா 1), மார்பக புற்றுநோய் மரபணு 2 (ப்ராக்கா 2) இருக்கிறவர்களுக்கு புற்றுநோய் வருவதற்கான வாய்ப்புகள் அதிகம்.

எனவே உங்கள் குடும்பங்களில் யாருக்காவது புற்றுநோய் வந்திருந்தால் கண்டிப்பாக நீங்கள் ஒரு மரபுவழி பரிசோதனை செய்து புற்றுநோய் மரபணு இருக்கிறதா என்று பார்த்துக் கொள்ளுங்கள். அது பாசிட்டிவா அல்லது நெகட்டிவா என்று பார்த்தால் உங்களுடைய ஆபத்து காரணிகள் தெரியும்.

குடும்ப மரபுவழி, ஹார்மோன் சார்ந்திருத்தல், உடல் ரீதியான வாழ்க்கை முறை காரணிகள் ஆகிய மூன்றும் தான் புற்றுநோய் வருவதற்கான முக்கியமான காரணங்கள் ஆகும்.

ஈஸ்ட்ரோஜன் அளவு அதிகமாக இருக்கும் பெண்கள்:

பொதுவாக மார்பக புற்றுநோய் வருவதற்கான காரணமே ஈஸ்ட்ரோஜன் ஹார்மோன் அதிகமாக இருப்பது தான். மார்பகத்தில் ஈஸ்ட்ரோஜன் ஏற்பிகள் மற்றும் புரோஜெஸ்ட்ரோன் ஏற்பிகள் ஆகியவை இருக்கிறது.

ஈஸ்ட்ரோஜன் அளவு அதிகமாகும் போது இந்த ஏற்பிகளின் செயல்பாடுகள் அதிகரித்து செல்களின் வளர்ச்சி தூண்டப்படும். அதன் காரணமாக மார்பகத்தில் பால் சுரக்கும் பகுதியில் இருக்கிற எபிடெலியல் செல்கள் தூண்டப்பட்டு அது வளரத் தொடங்கி கூடுதலாக வளர்ச்சி அடைந்து புற்றுநோயாக மாறுகிறது.

இந்த வகையில் ஈஸ்ட்ரோஜன் அதிகமாக இருக்கும் பெண்களுக்கு மார்பக புற்றுநோய் பாதிப்பு ஏற்படுகிறது.

பொதுவாக ஈஸ்ட்ரோஜன் அதிகமாக யாருக்கு இருக்கும் என்று பார்த்தால் ரொம்ப காலம் மார்பகத்தில் ஈஸ்ட்ரோஜன் உருவாகும் பெண்களுக்கு தான் ஈஸ்ட்ரோஜன் ஹார்மோன் அதிகமாக இருக்கும்.

குறிப்பாக பல பெண்கள் 11 வயதுக்கு முன்பே பருவமடைகிறார்கள். பருவமடைதல் என்பது பெண்களுக்கு ஈஸ்ட்ரோஜன் அளவு அதிகமாக இருப்பதை குறிக்கிறது. அதாவது அவர்களுக்கு ஈஸ்ட்ரோஜன் வரத்தொடங்கி விட்டது என்று அர்த்தம். இது குறிப்பிட்ட வயதுக்கு முன்பே பருவமடைதல் ஆகும்.

இரண்டாவது தாமதமான மெனோபாஸ், அதாவது 50 வயதுக்கு மேலும் மாதவிலக்கு நிற்காத பெண்கள் ஆவர். இந்த 2 வகையான பெண்களுக்கும் ஈஸ்ட்ரோஜன் ஹார்மோன் அதிகமாக உள்ளது. மார்பக திசுக்களில் ஈஸ்ட்ரோஜன் அளவு அதிகமாக இருப்பதால் பல நேரங்களில் இது ஒரு ஆபத்து காரணியாக கருதப்படுகிறது.

ஹார்மோன்கள் இயற்கையாக வருவது அதிகமாக இருக்கும் கால கட்டங்களில் பெண்களுக்கு மார்பக புற்றுநோய் வருகிறது. அதனால் தான் சிறு வயதிலேயே பருவமடைந்த பெண்களுக்கு கண்டிப்பாக மார்பகப் புற்று நோய்க்கான பரிசோதனையை ஆரம்ப நிலையிலேயே செய்ய வேண்டும்.

மேலும் 50 வயதை கடந்த பெண்களுக்கு மாதவிலக்கு நிற்காமல் வந்துகொண்டே இருந்தால் கண்டிப்பாக அவர்களும் மார்பகப் புற்றுநோய் பரிசோதனை செய்ய வேண்டும்.

தாய்ப்பால் கொடுக்காத பெண்கள்:

இன்றும் பெண்களுக்கிடையே அதிகரித்து வருகிற ஒரு முக்கியமான பிரச்சனை கருத்தரிப்பதை தள்ளிப்போடுவது ஆகும்.

30 வயதை கடந்த பெண்கள் குழந்தை பேறு பெறுவதற்கான பல்வேறு சிகிச்சை முறைகளை எடுத்துக்கொள்வது அதிகரித்து வரும் இந்த காலகட்டங்களில் மிகவும் தாமதமாக கருத்தரிப்பது ஒரு ஆபத்து காரணியாக கருதப்படுகிறது.

அதேபோல் குழந்தைக்கு தாய்ப்பால் கொடுக்காத பெண்களுக்கும் புற்றுநோய் வருவதற்கான வாய்ப்புகள் அதிகம். ஏனென்றால் கர்ப்ப காலத்தில் பெண்களுக்கு புரோஜெஸ்ட்ரோன் என்கிற ஹார்மோன் அதிகமாகும். ஈஸ்ட்ரோஜனுக்கு எதிராக இருக்கிற இன்னொரு ஹார்மோன் தான் புரோஜெஸ்ட்ரோன்.

பெண்களுக்கு கர்ப்பகாலத்தில் தான் இந்த புரோஜெஸ்ட்ரோன் ஹார்மோன் உருவாகுதல் அதிகமாக இருக்கிறது. எனவே கருத்தரித்தல் தாமதமாகும் போது அதிக காலம் ஈஸ்ட்ரோஜன் உருவாகிறது.

அதேபோல் கர்ப்பம் தரிக்காத பெண்களுக்கு இந்த புரோஜெஸ்ட்ரோன் ஹார்மோனே இல்லாமல் ஈஸ்ட்ரோஜன் ஆதிக்கமே அதிகமாக இருகிறது. இதனால்தான் புற்றுநோய் வருவதற்கான வாய்ப்புகள் அதிகம்.

குழந்தைகளுக்கு தாய்ப்பால் கொடுக்கும் போது புரோஜெஸ்டிரோன், ஆக்சிடோசின் உள்ளிட்ட எல்லா ஏற்பிகளும் ஈஸ்ட்ரோஜன் ஏற்பிகளின் உணர்திறனை குறைக்கும். இவை அனைத்தும் பால் சுரப்பதற்கு முக்கியமான ஒன்றாகும்.

எனவே தாய்ப்பால் சரியாக கொடுக்காத பெண்களுக்கு ஈஸ்ட்ரோஜன் தாக்கம் அதிகமாகி அதனால் மார்பக புற்றுநோய் வருவதற்கான வாய்ப்புகள் அதிகம்.

நீண்ட காலமாக பெண்கள் மார்பக புற்றுநோயால் பாதிக்கப்பட்டு அவதிப்பட்டு வருகின்றனர். பலரும் ஆரம்ப கட்டத்திலேயே அதை கண்டறியாமல் விடுவதால் அதன் தீவிரமும் அதிகமாகி விடுகிறது. அதற்கு காரணம் மார்பக புற்றுநோய் குறித்து போதிய விழிப்புணர்வு இல்லாமையே.

பரம்பரை நோய் அல்ல:

கண்டிப்பாக. எல்லோருக்கும் மார்பக புற்றுநோய் வருவதற்கான வாய்ப்புகள் உண்டு. குடும்பத்தில் யாருக்காவது இருந்தால் தான் மார்பக புற்றுநோய் வரும் என்றெல்லாம் எந்த அவசியமும் இல்லை.

புள்ளி விவரங்களின் படி ஒட்டுமொத்தமாக 100 சதவீத மார்பக புற்றுநோயாளிகளில் 20 சதவீதம் மட்டுமே குடும்பவழி பாதிக்கப்பட்டவர்களாக உள்ளனர். பிற 80 சதவீதம் நோயாளிகளுக்கு பல்வேறு காரணங்களால் மார்பக புற்றுநோய் பாதித்துள்ளது.

புகைப்பழக்கம் மற்றும் மதுப்பழக்கம்:

மார்பக புற்றுநோய் மட்டுமின்றி அனைத்து விதமான புற்றுநோய்களுமே வராமல் இருக்க ஆரோக்கியமான வாழ்க்கைமுறை மிக அவசியம். சரியான உயரம், எடை, பிஎம்ஐ நிர்வகித்தல் மற்றும் புகைப்பழக்கம், குடிப்பழக்கத்தை தவிர்த்தல் அவசியமானது. ஆனால் இதனால் மட்டுமே உங்களுக்கு புற்றுநோய் வராது என்று உறுதி கொடுக்க முடியாது.

ஒருவருக்கு புற்றுநோய் ஏற்பட பல்வேறு விதமான காரணங்கள் இருக்கின்றன. எனவே, குறிப்பிட்ட ஒரு விஷயத்தை மட்டும் புற்றுநோய் காரணமாக கருத முடியாது. அதே சமயம் ஆரோக்கியமான வாழ்க்கை முறையை பின்பற்றுவதால் புற்றுநோய் ஏற்படுவதற்கான வாய்ப்புகளை குறைக்க முடியும்.

உள்ளாடை:

இந்த சந்தேகம் பலருக்கும் நீண்ட நாட்களாகவே இருந்து வருகிறது. இது வீணாக பரவும் பொய் வதந்தி மட்டுமே. எந்த விதமான உள்ளாடைகளையும் பயன்படுத்துவதால் புற்றுநோய் வருவதற்கான வாய்ப்பு கிடையாது என்பதே உண்மை.

சர்க்கரை அளவு அதிகரித்தல்:

எந்த ஒரு தனித்த உணவும் புற்றுநோயை உண்டாக்கும் என்று நிரூபிக்கப்பட்டதில்லை. ஆனால், நீண்ட நாட்களாகவே நீங்கள் அதிகமான அளவு சர்க்கரையை எடுத்து கொண்டு வரும்போது அதன் சங்கிலி தொடராக அதிகமான ஜங்க் உணவுகள் மற்றும் பதப்படுத்தப்பட்ட உணவுகளையும் உண்ண வேண்டியிருக்கும். இதனால் உங்கள் எடை அதிகரிக்கும் வாய்ப்பு அதிகம்.

இதுவே உங்களுக்கு புற்றுநோயை உருவாக்கும் காரணமாக அமையலாம். மேலும், பொதுவாகவே அதிகமான சர்க்கரையை எடுத்து கொள்வது நல்லது அல்ல.

வருடம் ஒருமுறை மேமோகிராம்:

பலரும் வருடத்திற்கு ஒருமுறை மேமோகிராம் எடுப்பதால் மட்டுமே எந்தவிதமான புற்றுநோய் கட்டிகளையும் கண்டறிந்து விட முடியும் என்று நம்புகிறார்கள். ஆனால், சில நேரங்களில் சிறிய கட்டிகள் மேமோகிராமால் கூட கண்டுபிடிக்கப்படாமல் போகலாம்.

கிட்டத்தட்ட 20 சதவீத தவறுகள் இப்படியும் நடக்கிறது. அதற்காகத்தான் சுய பரிசோதனை முறையை பயன்படுத்த வேண்டும். அதே சமயம் வருடம் ஒருமுறை மேமோகிராம் செய்வது நல்லது.

வாசனை திரவியங்கள்:

இதுவரை விஞ்ஞானப்பூர்வமாக எந்தவிதமான சான்றுகளும் வாசனை திரவியங்கள் பயன்படுத்துவதால் புற்றுநோய் ஏற்படுவதாக கண்டறியவில்லை. எனவே, அதற்கும் மார்பக புற்றுநோய்க்கும் எந்த சம்பந்தமும் கிடையாது.

புற்றுநோய் கட்டி வலியற்றதாக இருக்குமா?

மார்பக புற்றுநோய் கட்டிகளிலேயே இரண்டு வகை உள்ளது. இது நார்மல் கட்டிகள் மற்றும் புற்றுநோய் கட்டிகள் என்று உள்ளது. அது வலியற்றதாகவும் அல்லது வலி கொடுப்பதாகவும் இருக்கலாம்.

ஆனால், வலி கொடுக்கவில்லை என்பதற்காக அது நார்மல் என்றும் சொல்லிவிட முடியாது. எனவே நீங்கள் முதலில் சுய பரிசோதனை மூலமாக தெரிந்து கொள்ளுதல். மேமோகிராம் மற்றும் இதர தேவையான பரிசோதனைகளை செய்து உறுதி செய்து கொள்ளுதல் அவசியம்.

வயதான மற்றும் நடுத்தர வயது பெண்களுக்கு மட்டும்தான் வருமா?

இல்லை இதுவும் நீண்ட நாட்களாக நம்பப்பட்டு வரும் உண்மையற்ற விஷயம். மார்பக புற்றுநோய் இளம் வயதினிருக்கும் ஏற்படும். 20-30 சதவீதத்திற்கும் மேல் 20-லிருந்து 40 வயது வரை உள்ள பெண்களுக்கு மார்பக புற்றுநோய் ஏற்படுவது இயல்பான ஒன்றாக உள்ளது.

பலருக்கும் 20 , 25 வயதிலேயே மார்பக புற்றுநோய் வந்து விடுகிறது. இதை முன்னரே அறிந்து சிகிச்சை எடுத்துக் கொள்வது நல்லது. அதனால் சுய பரிசோதனையும் அதை தொடர்ந்து மருத்துவரிடம் ஆலோசனை செய்வதும் அதை தடுக்கவும் முன்கூட்டியே சிகிச்சை அளிக்கவும் முடியும்.

பெண்களுக்கு மட்டும்தான் வருமா?

இதுவும் பல நாட்களாக நம்பபடும் ஒன்று. மார்பக புற்றுநோய் பெண்களுக்கு மட்டும் அல்ல ஆண்களுக்கும் ஏற்படும். ஆனால், பெண்களோடு ஒப்பிடுகையில் ஆண்களுக்கு மிக மிக அரிதாகவே மார்பக பிரச்சனைகள் ஏற்படுகின்றன. அதனால், ஆண்களுக்கும் அரிதாக மார்பக புற்றுநோய் ஏற்படும் என்பதே உண்மை.

மார்பகத்தில் ஏதும் காயங்கள்:

மார்பகத்தில் காயங்கள் ஏற்படுவதால் மார்பக புற்றுநோய் வராது. அந்த சமயத்தில் நீங்கள் எடுக்கும் பரிசோதனைகள் மூலம் ஏற்கனவே இருக்கும் புற்றுநோய் கட்டிகளை கண்டுபிடிக்க வாய்ப்புகள் இருக்கின்றதே தவிர காயம் ஏற்பட்டதால் உங்களுக்கு மார்பக புற்றுநோய் வர வாய்ப்பு இல்லை.

பெண்கள் கவனிக்க வேண்டிய அறிகுறிகளில் முக்கியமானது கருப்பை வாய் புற்றுநோய். ஏன் இந்த நோய்க்கு அவ்வளவு முக்கியத்துவம் கொடுக்க வேண்டும் இதன் அறிகுறிகள் பரிசோதனை முறைகள் மற்றும் சிகிச்சை முறைகள் குறித்து தெரிந்துகொள்வோம்.

கருப்பை இணைக்கும் பெண்களின் கருப்பைவாய் பகுதியில் செல்கள் மாறும் போது கருப்பை வாய் புற்றுநோய் உண்டாகிறது. இந்த புற்றுநோயானது அவர்களின் ஆழமான திசுக்களை பாதிக்கலாம்.

மேலும் உடலின் மற்ற பகுதிகளுக்கு பெரும்பாலும் நுரையீரல், கல்லீரல், சிறுநீர்ப்பை, யோனி மற்றும் மலக்குடல் ஆகியவற்றுக்கும் பரவக்கூடும்.

கருப்பை வாய் புற்றுநோயின் பெரும்பாலான நிகழ்வுகள் மனித பாப்பிலோமா வைரஸ் தொற்று காரணமாக உண்டாகின்றன. இது தடுப்பூசி மூலம் தடுக்கப்படுகிறது. கருப்பை வாய் புற்றுநோய் மெதுவாக வளர்ச்சியடையும், இது கடுமையான பிரச்சனைகளை உண்டாக்கும் முன்பு கண்டறிந்து சிகிச்சை அளிப்பது முக்கியம். ஏனெனில் ஒவ்வொரு ஆண்டும் தீவிர பாதிப்பு கொண்டுள்ள பெண்களை கொல்லவே செய்கிறது.

35 வயது முதல் 44 வயதுடைய பெண்கள் இதை அதிகம் எதிர்கொள்கிறார்கள். 15 சதவீதத்துக்கும் அதிகமான வழக்குகளில் 65 வயதுக்கு மேற்பட்ட பெண்கள் உள்ளனர்.

அறிகுறிகள்

கருப்பை வாய் புற்றுநோயின் அறிகுறிகளை நீங்கள் சரிவர கவனிக்காமல் இருக்கலாம். ஏனெனில் இவை ஆரம்ப கட்ட அறிகுறிகளை உண்டாக்காது.

* உடலுறவு கொள்ளும் போது வலி

* உடலுறவுக்கு பிறகு வலி

* மாதவிடாய்க்கு இடையில் வலி

* மாதவிடாய் நின்ற பிறகு அல்லது இடுப்பு பரிசோதனைக்கு பிறகு அசாதாரண யோனி ரத்தப்போக்கு

அசாதாரண யோனி வெளியேற்றம், இது கனமாகவும் துர்நாற்றமாகவும் இருக்கலாம். பரவிய பிறகு புற்றுநோய் உண்டாகலாம்.

* இடுப்பு வலி

* சிறுநீர் கழிப்பதில் சிக்கல்

* வீங்கிய கால்கள்

* சிறுநீரக செயலிழப்பு

* எலும்பு வலி

* எடை இழப்பு மற்றும் பசியின்மை

* சோர்வு போன்றவை இருக்கலாம்.

ஒரு பெண்ணுக்கு 21 அல்லது 22 வயது கடக்கும் போதே கருப்பை வாய்ப்புற்றுநோய் பரிசோதனை செய்வது நல்லது. பேப்ஸ்மியர் பரிசோதனை என்று அழைக்கப்படும் இந்த பரிசோதனை வலி இல்லாதது.

ஒவ்வொரு பெண்ணும் உடலுறவு வாழ்க்கைக்கு நுழைந்த பிறகு பேப்ஸ்மியர் பரிசோதனை மிகவும் அவசியம். இதன் மூலம் தொற்று இருப்பதை முன்கூட்டியே கண்டறிய முடியும்.

இது ஹெச்பிவி வைரஸ் 200 முதல் 300 விதமானவை உண்டு. இதில் அதிகமாக 16 முதல் 18 வரையான வேரியண்ட்கள் கர்ப்பப்பை வாய்ப்புற்றுநோய்க்கு காரணமாகிறது.

21 முதல் 34 வயது வரை இருக்கும் பெண்கள் 2 முதல் 3 வருடங்களுக்கு ஒரு முறை இந்த பரிசோதனை செய்ய வேண்டும்.

35 வயதை கடந்தாலே வருடம் ஒருமுறை பேப்ஸ் மியர் பரிசோதனை செய்ய வேண்டும். இதனோடு ஹெச்பிவி பரிசோதனையும் செய்து கொள்ளலாம்.

டெஸ்டோஸ்டிரோன் குறைபாடு இரண்டு வகையாக பிரிக்கப்படும்.

முதல் வகை: இது விதைப்பையில் உள்ள பிரச்சினைகளால் ஏற்படும் டெஸ்டோஸ்டிரோன் குறைபாடு. அவை விதைப்பைக்குள் கீழிறங்காத விதைகள், வழக்கமாக உள்ள எக்ஸ்-ஒய் குரோமோசோம்களுக்கு பதிலாக இரண்டு எக்ஸ் குரோமோசோம்கள் காணப்படும் நிலை.

விந்தணுக்கள் உற்பத்தி செய்யும் செம்னிபெரஸ் குழல்களில் லீடிக் செல், டூபுலார் செல், செர்டோலை செல்கள் இருக்க வேண்டும். ஆனால் சிலருக்கு செர்டோலை செல்கள் மட்டுமே காணப்படும். லீடிக் செல்கள் தான் டெஸ்டோஸ்டிரோனின் சீரான உற்பத்திக்கு காரணம்.

சிஸ்டிக் பைப்ரோசிஸ், தட்டம்மை நோயால் விதைகளில் ஏற்படும் தொற்று. விதைகளில் வரும் புற்றுநோய். ரத்தத்தில் இரும்புச் சத்து அதிகமாக இருப்பது.

இரண்டாம் வகை: ஹைபோதாலமஸ் மற்றும் பிட்யூட்டரி சுரப்பி இவை டெஸ்டோஸ்டிரோன் உற்பத்தி செய்ய விதைகளுக்கு சமிக்ஞை செய்யும் மூளையின் பாகங்கள் ஆகும். ஹைபோதாலமஸ் கோனாடோட்ரோபினை வெளியிடும் ஹார்மோனை உருவாக்குகிறது.

இது பிட்யூட்டரி சுரப்பியில் இருந்து சினைமுட்டை தூண்டுதல் ஹார்மோன் எப்.எஸ்.ஹெச் மற்றும் லுடினைசிங் ஹார்மோன் எல்.ஹெச் உருவாக்க சமிக்ஞை செய்கிறது.

லுடினைசிங் ஹார்மோன் பின்னர் லீடிக் செல்கள் மூலம் டெஸ்டோஸ்டிரோனை உற்பத்தி செய்ய விதைகளுக்கு சமிக்ஞை செய்கிறது.

இரண்டாம் வகையில் பிட்யூட்டரி சுரக்கும் ஆண் இனப்பெருக்க ஹார்மோன்கள் குறைபாடு டெஸ்டோஸ்டிரோன் அளவு குறைவாக இருப்பதற்கு காரணமாகிறது.

அறிகுறிகள்:

தாம்பத்திய உறவில் ஆர்வமில்லாமை, விந்தணு குறைபாடு, முகம் மற்றும் உடலில் முடி வளர்ச்சி குறைவாக இருப்பது, மார்பக திசுக்களின் வளர்ச்சி, எலும்பு நிறை இழப்பு (ஆஸ்டியோபோரோசிஸ்), மனம் மற்றும் உணர்ச்சி மாற்றங்கள்.

உணவுப் பழக்கவழக்கங்கள்:

டெஸ்டோஸ்டிரோன் அதிகரிக்கும் அசைவ உணவுகளில், நாட்டுக்கோழி முட்டை, இறைச்சி வகைகள், ஒமேகா-3 கொழுப்பு நிறைந்த கடல் சிப்பிகள், சூரை மீன், மத்திச்சாளை மீன்கள்.

பருப்பு வகைகளில் பாதாம், பிஸ்தா, அக்ரூட் பருப்புகள், பூசணி விதைகள். பழங்களில், செவ்வாழை, நேந்திரம், பேரீச்சம் பழம், திராட்சை பழம், பெர்ரி வகைகள், அவகோடா, பலாப்பழம், மாம்பழம், துரியன் பழம், அத்திப்பழம், நாட்டு மாதுளம்பழம்.

காய்கறிகளில் சின்ன வெங்காயம், பூண்டு, பசலைக்கீரை, தூதுவளை, நறுந்தாளி, முருங்கை, அறுகீரை, தக்காளி, புடலங்காய், அவரை பிஞ்சு, முருங்கை பிஞ்சு, முருங்கை காய், பீன்ஸ், பட்டர் பீன்ஸ், கேரட், சர்க்கரை வள்ளிக் கிழங்கு, உருளைக்கிழங்கு, பனங்கிழங்கு போன்றவை நல்ல பலன் தரும்.

சித்த மருத்துவம்:

சாலாமிசிரி லேகியம் 1-2 கிராம் வீதம் காலை, இரவு உணவிற்கு பின்.

மதன காமேஸ்வர லேகியம் 1-2 கிராம் வீதம் காலை, மாலை இரவு உணவிற்கு பின்.

நெருஞ்சில் விதை, பூனைக்காலி விதை, நீர்முள்ளி விதை, சாரப்பருப்பு, சாதிக்காய், நிலப்பனைக்கிழங்கு, பூமி சர்க்கரை கிழங்கு, அமுக்கரா கிழங்கு, சதாவரி கிழங்கு இவை சேர்ந்த மருந்துகளை சித்த மருத்துவரின் ஆலோசனைப்படி எடுத்தால் நல்ல பலன் கிடைக்கும்.

பல வகையான ஃபேஸ் மாஸ்க் ஒவ்வொரு முக சருமத்திற்கு ஏற்ப மாறுபடும். ஆனால் நம்முடைய சருமத்திற்கு எந்த ஃபேஸ் மாஸ்க் நல்ல பலன் அளிக்கும் என்பதை அறிந்து அதனை பயன்படுத்தி வந்தால் நல்ல பலன் கிடைக்கும்.

நாம் முகத்துக்கு பயன்படுத்தப்படும் சார்க்கோல் என்பது ஆக்டிவேட்டடு சார்க்கோல் ஆகும். ஆக்டிவேட்டடு சார்க்கோல் என்பது கார்பனின் பதப்படுத்தப்பட்ட வடிவம் ஆகும்.

இது அழகு சாதனப்பொருட்களில் பரவலாக பயன்படுத்தப்படுவதோடு மற்ற துறைகளிலும் பயன்படுத்தப்படுகிறது. சார்க்கோல் பயன்பாடு சருமத்திற்கு பல்வேறு நன்மைகளை தருகிறது.

சருமத்தின் துளைகளில் இருக்கும் துகள்களை ஆழமாக சுத்தம் செய்ய இந்த சார்கோல் ஃபேஸ் மாஸ்க், மிகவும் பயனுள்ளதாக இருக்கும்.

சருமத்தில் இருக்கும் துகள்களால் சருமம் எளிதில் வெடிப்பு, எண்ணெய் பசை போன்றவற்றை உண்டாக்கும். இதை எளிதில் சரிசெய்வதற்கு சார்கோல் ஃபேஸ் மாஸ்க் உதவுகிறது.

சார்கோல், அடைப்பை சரி செய்து சருமத்தை சுத்தமாக்க உதவுகிறது. இதனால் சருமத்தில் தொற்று முகப்பரு போன்றவை குறைகிறது.

அதிகப்படியான வியர்வை, திறந்த காயம், அழுக்குப்படிவது மற்றும் முகச்சீர்ப்படுத்தும் கருவிகளை பலரும் பயன்படுத்துவது போன்ற காரணங்களால் சருமத்தில் அழுக்குகள் தேங்கும். அப்போது சார்கோல் பயன்படுத்தினால், நல்ல பலனைத் தரும்.

ஆக்டிவேட்டட் கரித்தூளில் உள்ள துகள்கள் சருமத்தில் இறந்த சரும செல்களை துடைக்க உதவுகிறது. மேலும் பளிச்சென்ற சருமத்தை அளிக்க உதவுகிறது.

ஆக்டிவேட்டட் சார்கோல் எண்ணெய் சருமத்துக்கு சிறந்த துணையாக இருக்கும். சருமத்தில் இருக்கும் அதிகப்படியான எண்ணெயை நீக்குவதால் சருமம் வறண்டிருந்தாலும் கூட, சருமத்தின் ஈரப்பதத்தை சமநிலையில் பராமரிக்கவும் இது உதவுகிறது.

மேலும் இதை ஆலோவேரா உடன் கலந்து பயன்படுத்தலாம். இது சருமத்தில் இருக்கும் நச்சுக்களை நீக்கவும் செய்கிறது. சருமத்தை சுத்தப்படுத்துவது மட்டுமல்லாமல் நீண்ட காலத்துக்கு சீரான பிரகாசத்தையும் கொடுக்க உதவுகிறது. 

கருத்தடை சாதனங்களில் பல வகைகள் இருந்தாலும் பெண்களுக்கு காப்பர்-டி பெரும்பாலும் பரிந்துரைக்கப்படுகிறது.

இந்த காப்பர்-டி கருப்பையில் வைக்கும் போது இதில் இருக்கும் தாமிர அயனியானது கர்ப்பப்பை வாய் மற்றும் உட்புறம் இருக்கும் திரவத்துடன் கலந்துவிடுகிறது.

இந்த திரவம் தான் விந்தணுக்களை கருமுட்டையுடன் சேராமல் தடுக்கிறது. இந்த காப்பர் டி சாதனத்தில் இருக்கும் செம்பு விந்தணுக்களை அழிக்கும் திறனை கொண்டிருப்பதால் இவை கருத்தரித்தலை தடுத்துவிடுகிறது.

மேலும் காப்பர் டி பொருத்திய பிறகு குறிப்பிட்ட இடைவேளைக்கு பிறகு பரிசோதனை செய்து கொள்ள வேண்டும்.

குழந்தை பிறந்தவுடன் காப்பர் டி பயன்படுத்தினால் பிரசவத்துக்கு பிறகு சுமார் 8 வாரங்கள் காத்திருக்கவும். மாதவிலக்கு முடியும் நாளில் காப்பர் டி பொருத்தி கொள்ள வேண்டும்.

காப்பர் – டி நன்மைகள்

காப்பர் – டி காப்பரால் செய்யப்பட்டது. இது நீண்ட காலம் நீடிக்கும். காப்பர் டி ஹார்மோன் அல்லாத பிறப்புக்கட்டுப்பாடு என்பதால் இது உடலில் எத்தகைய மாற்றத்தையும் ஏற்படுத்தாது.

காப்பர் – டி பயன்படுத்துவதால் உடலில் உள்ள எந்த ஹார்மோன்களையும் பாதிக்காது. கருத்தடை மாத்திரைகளால் உடலில் ஹார்மோன் பிரச்சனை வரும் என்று நினைப்பவர்கள் காப்பர்– டி பயன்படுத்தலாம்.

விந்து வருவதற்குள் விந்து வரும் இடத்துக்கு வெள்ளை அணுக்கள் முந்திவந்து விந்தணுக்களை செயலிழக்க செய்கிறது.

இந்த காப்பர் – டி பயன்பாடு உடலில் வெள்ளை அணுக்களை அதிகரிப்பதாக ஆய்வுகள் தெரிவிக்கிறது.

கருத்தடைக்காக உடலுறவில் குறுக்கிடாது. மேலும் இது 10 ஆண்டுகள் வரை பயன்படுத்த முடியும். பலனளிக்கும் என்பதால் நிம்மதியாக பாதுகாப்பாக உணரலாம்.

பெண்கள் பிரசவத்துக்கு பிறகு தாய்ப்பால் கொடுக்கும் போது இதை பயன்படுத்தலாம். ஹார்மோன் பிறப்பு கட்டுப்பாட்டு முறைகள் தொடர்பான ரத்த உறைவு போன்ற பக்கவிளைவுகளின் அபாயத்தை கொண்டிருக்கவில்லை.

தீமைகள்

காப்பர் – டியின் பொதுவான பக்க விளைவுகள் என்றால் ஒழுங்கற்ற மற்றும் அதிக ரத்தப்போக்கு.

மற்றொரு பக்க விளைவு மாதவிடாய் வலி அதிகரிக்கலாம்.

குறிப்பாக பிரசவிக்காத பெண்களை விட பிரசவித்த பெண்கள் குறைவான பக்கவிளைவுகளை கொண்டிருக்கிறார்கள்.

காப்பர் – டி பொருத்தும் போது வலி, செருகிய சில நாட்களுக்கு தசைப்பிடிப்பு மற்றும் முதுகுவலி பெரும்பாலான மக்களுக்கு இந்த பக்கவிளைவுகள் பொதுவாக 3-6 மாதங்களுக்குள் மறைந்துவிடும்.

சர்க்கரை வியாதி இருக்கும் பெண்களுக்கு பாலியல் பிரச்சினைகள் வராமல் கண்டிப்பாக தடுக்க முடியும். அதற்கான வழிமுறைகள் என்னவென்றால், முதல் முக்கியமான விஷயமே அவர்களின் சர்க்கரை கட்டுப்பாடு தான்.

சாப்பிடுவதற்கு முன்பு ரத்த சர்க்கரை அளவு 110-க்குள் இருக்க வேண்டும். சாப்பிட்ட பிறகு 2 மணி நேரம் கழித்து 160-க்குள் இருக்க வேண்டும். 3 மாத கட்டுப்பாடு 6.5-க்குள் இருக்க வேண்டும்.

சர்க்கரையை இதே அளவில் வைத்து அவர்கள் உணவுக் கட்டுப்பாட்டை கடைபிடித்தால் கண்டிப்பாக பாலியல் உறவு முறைகளில் பிரச்சனைகள் வராது. ஆனால் இதுவே அதிகமாகும் போது தான் தொற்றுக்கள் ஏற்படும்.

எனவே இந்த பிரச்சினையால் பாதிக்கப்பட்ட பெண்களுக்கு முக்கியமான முதல் அறிவுரை உணவு கட்டுப்பாட்டுடன் இருக்க வேண்டும்.

இதுதவிர சில பெண்கள், எனக்கு எல்லாமே கட்டுப்பாட்டில் இருக்கிறது ஆனாலும் பாலியல் உணர்வு குறைவாக இருக்கிறது, ஆர்வம் குறைவாக இருக்கிறது என்று சொல்வார்கள். அதற்கு முக்கியமான காரணம் என்னவென்றால் சர்க்கரை அளவை கட்டுப்பாட்டில் வைத்திருக்கும் பெண்களுக்கு ரத்த அழுத்தமும் இருக்கும்.

ரத்த அழுத்தத்துக்கு உட்கொள்கிற மாத்திரைகள் நரம்பு மண்டலங்களில் பாதிப்பை உண்டாக்கி அதன் மூலமாக அவர்களுடைய உறவு கொள்ளும் முறைகளையும் பாதிக்கிறது. இது ரத்த அழுத்தத்துக்கான மாத்திரைகளின் பக்க விளைவுகள் ஆகும்.

எனவே ரத்த அழுத்தத்துக்கு மாத்திரை சாப்பிடுபவர்களுக்கு அந்த மாத்திரையின் பக்க விளைவால் இந்த பிரச்சனைகள் வரலாம்.

எனவே உணவு பழக்க வழக்க முறைகளை மாற்றுங்கள், உடற்பயிற்சிகளை அதிகப்படுத்துங்கள், முறையாக சர்க்கரையை கட்டுப்படுத்துவதற்கான மருந்து மாத்திரைகளை எடுத்துக் கொள்ளுங்கள், தேவைப்படும்போது இதற்கான சில சிகிச்சைகளையும் முறையாக எடுத்துக்கொள்ளுங்கள்.

இதனால் ஏற்படுகிற பின் விளைவுகள், சர்க்கரை கட்டுப்பாட்டில் இல்லாததால் ஏற்படுகிற பிரச்சனைகளை புரிந்து ஒவ்வொரு காலகட்டத்திலும் அதனை கட்டுப்பாட்டில் வைத்திருப்பதற்கான வழி முறைகளை எடுத்துக்கொள்ள வேண்டும்.

மேலும் தகுதியுள்ள மருத்துவரை அணுகி முறையாக உறவு கொள்வதற்கான வழிமுறைகளை சீர் செய்து கொள்ள வேண்டும். முறையாக பார்த்துக்கொண்டால் கண்டிப்பாக பின்விளைவுகள் வராது.

சர்க்கரை நோய் இருக்கிற பெண்களுக்கு சிறுநீர் தொற்று, பெண்ணுறுப்பில் தொற்று ஆகியவை தவிர அவர்களுக்கு அந்த இடத்தில் வேறு பல வகையிலும் தொற்றுக்கள் அதிகரிக்க வாய்ப்பு உண்டு. இதனால் உறவு கொள்வதில் ரொம்ப பிரச்சனைகள் இருக்கும்.

சிலருக்கு ரத்த அழுத்தம் அதிகமாகும், சில நேரங்களில் காய்ச்சல் கூட வரும். இவை எல்லாமே இந்த பிரச்சனைகளின் வெளிப்பாடுதான்.

ஆரம்ப நிலையிலேயே சிகிச்சை:

எனவே சர்க்கரை வியாதி இருக்கின்ற பெண்கள் முறையாக, முழுமையாக, ஆரம்ப நிலையிலேயே அதற்கான சிகிச்சைகளை பெற வேண்டும். அந்த சிகிச்சை முறைகள் பற்றியும் நன்றாக தெரிந்து வைத்திருக்க வேண்டும். சர்க்கரை நோய் இருப்பதை கண்டுபிடித்த பின்பு சர்க்கரை நோய் வந்து விட்டதே என்று கவலைப்படாதீர்கள்.

அதை எப்படி கையாண்டு அதில் இருந்து வெளிவருவது என்பதை முறையாக சில பரிசோதனை முறைகள் மூலம் தெரிந்து கொண்டு அதை செயல்படுத்துங்கள். இதன் மூலம் சர்க்கரை வியாதி கட்டுக்குள் இருக்கும். சர்க்கரை வியாதி கட்டுக்குள் இருக்கும் பட்சத்தில், பாலியல் உறவு பிரச்சனைகளும், குழந்தையின்மை பிரச்சனைகளும் கண்டிப்பாக சரியாகும்.

புரோஜெஸ்ட்டிரோன் என்பது ஒரு பெண்ணின் மாதவிடாய் சுழற்சியின் இரண்டாம் பாதியில், கருமுட்டை விடுப்பின் பின்னர் கருப்பையில் உற்பத்தி செய்யப்படும் முதன்மை இனப்பெருக்க ஹார்மோன் ஆகும்.

கருவுறுதலுக்கு இது மிகவும் அவசியம். அதனால் இதை கர்ப்பத்தின் ஹார்மோன் என்றும் அழைக்கிறார்கள். இது, ஆரோக்கியமான மாதவிடாய்க்கு முக்கியமானது.

குறைவான புரோஜெஸ்ட்டிரோன் ஒரு பெண்ணின் இளமை பருவத்தில் அல்லது மாதவிடாய் முடிவதற்கு அதாவது மெனோபாசுக்கு முன்னர் ஏராளமான பாதிப்புகளை உண்டாக்கும்.

அறிகுறிகள்

சராசரி மாதவிடாய் சுழற்சி 28-30 நாட்கள் ஆகும். 25 நாட்களுக்கும் குறைவான மாதவிடாய் சுழற்சிகள், ஒரேமாதத்தில் இருமுறை வருகிற மாதவிடாய், சிறிது சிறிதாக வரும் ஸ்பாட்டிங் போன்றவை குறைந்த புரோஜெஸ்ட்டிரோன் அளவைக் குறிக்கலாம். இதனால் கருப்பையில் எண்டோமெட்ரியத்தின் வளர்ச்சியை சரிவர பராமரிக்க முடியாது. எனவே ஸ்பாட்டிங் ஏற்படலாம்.

புரோஜெஸ்ட்டிரோன் குறைவால் முதல் மூன்று மாத கர்ப்பங்களில் கருச்சிதைவு ஏற்பட வாய்ப்பு அதிகம் உள்ளது. குறைந்த புரோஜெஸ்ட்டிரோன் அளவு ஈஸ்ட்ரோஜன் ஆதிக்கத்திற்கு பங்களிக்கலாம். அல்லது ஈஸ்ட்ரோஜன் மற்றும் புரோஜெஸ்ட்டிரோன் இடையே ஏற்றத்தாழ்வு ஏற்படலாம். இதனால் கடுமையான ரத்தப்போக்கு, வலி மிகுந்த மாதவிடாய், மனநிலை மாற்றங்கள், தூக்கமின்மை ஏற்படுகிறது.

உணவுப் பழக்கவழக்கங்கள்

புரோஜெஸ்ட்டிரோன் அளவை அதிகரிக்க உணவில் வைட்டமின் சி அதிகமுள்ள சிட்ரஸ் பழங்கள் சாப்பிட்டால் நல்ல பலனை தரும்.

ஹார்மோன் ஆரோக்கியத்திற்கு நல்ல கொழுப்புகள் முக்கியம். ஏனெனில் அவை இனப்பெருக்க ஹார்மோன்களுக்கான கட்டுமானத்திற்கு அத்தியாவசியமானது.

அலிசி விதை (பிளாக் சீட்), ஆளி விதை, சியா விதை, பூசணி விதை, தேங்காய், பாதாம், பிரிம்ரோஸ் எண்ணெய், நல்லெண்ணெய் போன்றவை நல்லது.

புரோஜெஸ்ட்டிரோன் அளவை அதிகரிக்க வைட்டமின் பி6 மற்றும் துத்தநாகம் போன்ற ஊட்டச்சத்துக்கள் அதிகம் உள்ள உணவுகளும் உதவியாக இருக்கும்.

மத்தி மீன், சால்மன், சூரை மீன், ஆட்டுக்கல்லீரல், கொண்டைக்கடலை, வேர்க்கடலை, பட்டாணி, பருப்பு வகைகள், அவகேடோ, பெர்ரி பழங்கள், முட்டை ஆகியவற்றை உணவில் சேர்த்துக் கொள்ள வேண்டும்.

மனஅழுத்தம் புரோலாக்டின் மற்றும் கார்டிசோல் இரண்டையும் அதிகரிக்கலாம். இது கரு முட்டை வெளிவரும் போது புரோஜெஸ்ட்டிரோன் அளவை பாதிக்கும். சீரான உடற்பயிற்சி, யோகா, இறை தியானம் நல்ல பலனைத் தரும்.

சித்த மருத்துவம்

1) குமரி லேகியம்: காலை, இரவு 1-2 கிராம் வீதம் உணவுக்கு பின் சாப்பிட வேண்டும்.

2) சதாவரி லேகியம்: காலை, இரவு 1-2 கிராம் வீதம் உணவுக்கு பின் சாப்பிட வேண்டும்.

3) கல்யாண முருங்கை இலை, விஷ்ணுகிரந்தி, அசோகப்பட்டை, கரு நொச்சி, ஆலம் விழுது, கருஞ்சீரகம், சதகுப்பை, மரமஞ்சள் போன்ற மூலிகைகளில் செய்த ஏராளமான மருந்துகள் உள்ளன. இவற்றை சித்த மருத்துவரின் ஆலோசனைப்படி சாப்பிட்டால் நல்ல பலனைப் பெறலாம்.

பொதுவாக ரத்த அழுத்தம் என்பது உங்கள் தமனிகளின் சுவர்களுக்கு எதிராகத் தள்ளும் ரத்தத்தின் சக்தியாகும். தமனிகள் இதயத்திலிருந்து உடலின் மற்ற பகுதிகளுக்கு ரத்தத்தை எடுத்துச் செல்லும் ரத்த நாளங்கள்.

ஒவ்வொரு முறையும் இதயம் துடிக்கும்போது, அது தமனிகளுக்கு ரத்தத்தை செலுத்துகிறது. தமனிகளில் அழுத்தம் அதிகமாக இருந்தால், உயர் ரத்த அழுத்தம் உள்ளது.

உயர் ரத்த அழுத்தம் உங்கள் உறுப்புகளுக்கு கூடுதல் அழுத்தத்தை ஏற்படுத்தும். இது மாரடைப்பு, இதய செயலிழப்பு, பக்கவாதம் மற்றும் சிறுநீரக செயலிழப்புக்கு வழிவகுக்கும்.

சில பெண்களுக்கு கர்ப்பம் தரிக்கும் முன் உயர் ரத்த அழுத்தம் இருக்கும். மற்றவர்களுக்கு கர்ப்ப காலத்தில் முதல் முறையாக உயர் ரத்த அழுத்தம் ஏற்படும்.

கர்ப்ப காலத்தில் ரத்த அழுத்த அளவு எவ்வளவு இருக்க வேண்டும், அதிகமாக இருந்தால் ஏற்படும் பிரச்சனைகள் என்ன என்பதை பார்க்கலாம்.

கர்ப்ப காலத்தில் உயர் ரத்த அழுத்தம் பொதுவாக 140/90 mm Hg அல்லது அதற்கும் அதிகமாக வரையறுக்கப்படுகிறது.

குறைந்த ரத்த அழுத்தம் பொதுவாக 90/60 mm Hg அல்லது அதற்கும் குறைவாக வரையறுக்கப்படுகிறது.

அறிகுறிகள்:

சிவந்த தோல், கைகள் அல்லது கால்களின் வீக்கம், தலைவலி, மூச்சு திணறல், வயிற்று வலி, குமட்டல், வாந்தி, பார்வை மாற்றங்கள்

உங்களுக்கு உயர் ரத்த அழுத்தம் அல்லது உயர் ரத்த அழுத்தம் அறிகுறிகள் இருப்பதாக நீங்கள் சந்தேகித்தால், கர்ப்ப கால சிக்கல்களைத் தடுக்க உடனடியாக உங்கள் மருத்துவரை அணுகவும்.

எல்லா பெண்களும் தங்கள் முதல் ரோல் மாடலாக கருதும் நபர் தாயாகத்தான் இருப்பார். ஏனெனில் சிறு வயது முதலே ஒவ்வொரு விஷயத்தையும் தாயை பார்த்தே செய்ய தொடங்குவார்கள்.

எந்தவொரு புது முயற்சியை மேற்கொள்வதாக இருந்தாலும் அதில் தாயின் சாயல் வெளிப்படும். அந்த அளவுக்கு அவர்களின் ஒவ்வொரு செயல்பாடுகளும் தாயின் நடவடிக்கைகளை சார்ந்தே அமையும்.

குழந்தை பருவத்தில் தாயுடனான பந்தம் உணர்வுப்பூர்வமாக விளங்கும். ஆனால் டீன் ஏஜ் வயதை எட்டும்போது அந்த உறவு பந்தத்தில் சற்று தடுமாற்றம் ஏற்படக்கூடும்.

தாய் சொல்லும் சில விஷயங்களை கேட்கும் மன நிலையில் மகள் இருக்க மாட்டார். அதனால் மகள் தன்னிச்சையாக செயல்படுவது போன்ற உணர்வு தாயிடம் தோன்றும்.

மற்ற பருவத்தை விட டீன் ஏஜ் பருவத்தில்தான் தாயிடம் மகள் மீதான அக்கறையும் கூடும். அதுவே மகளுக்கு எதிர்மறை எண்ணங்களை தோற்றுவித்துவிடும்.

தன்னுடைய எதிர்பார்ப்புக்கு ஏற்ப மகள் நடந்து கொள்ள வேண்டும் என்று தாயார் விரும்புவார். அந்த எதிர்பார்ப்புகள் நிறைவேறாவிட்டாலோ, எதிர்பார்த்தபடி நடந்து கொள்ளாவிட்டாலோ மகள் மீது கடும் கோபத்தை வெளிப்படுத்துவார்கள்.

மகளை தங்களுடைய கட்டுப்பாட்டுக்குள் கொண்டு வருவதற்கு முயற்சி செய்வார்கள். அவர்களது நோக்கம் மகளை நல்வழிப்படுத்துவதாகவே இருக்கும். ஆனால் அதை மகள் புரிந்துகொள்ளாத பட்சத்தில் தேவையற்ற பிரச்சினைகள் இருவருக்கும் இடையே எட்டிப்பார்க்கும். அது தாய்-மகள் உறவில் விரிசலை ஏற்படுத்தும். அதனை தவிர்ப்பதற்கு செய்ய வேண்டிய முக்கியமான விஷயங்கள் இவை...

* டீன் ஏஜ் பருவத்தில் அழகுக்கு முக்கியத்துவம் கொடுக்கும் ஆர்வம் எல்லா பெண்களிடமுமே மேலோங்கும். ஆடை, அணிகலன் தேர்வுக்கு ரொம்பவே நேரம் செலவளிப்பார்கள். தங்களை மெருகேற்றுவதற்கான அத்தனை முயற்சிகளையும் மேற்கொள்வார்கள். பிடித்தமான அழகு சாதனப்பொருட்களையும் அதிகம் பயன்படுத்த ஆர்வம் காட்டுவார்கள்.

அதனை கண்டிக்கும் மனோபாவமே பெரும்பாலான தாய்மார்களிடம் இருக்கிறது. அதைவிடுத்து இந்த அழகு சாதனப் பொருட்களையெல்லாம் தன்னிச்சையாக உபயோகிக்கக்கூடாது. சரும நல நிபுணர்களிடம் ஆலோசித்து பொருத்தமானவற்றை தேர்ந்தெடுக்க வழிகாட்ட வேண்டும்.

அழகுக்கு கூடுதல் முக்கியத்துவம் கொடுப்பதை கண்டிக்காமல் மகள் மனம் நோகாதவாறு எடுத்துக்கூற வேண்டும். பணத்தை வீண் விரயம் செய்வதாக கடிந்து கொள்ளவும் கூடாது. எவையெல்லாம் அழகை மெருகேற்ற பொருத்தமாக இருக்கும் என்பதை பக்குவமாக எடுத்துக்கூற வேண்டும்.

* மகளின் செயல்பாடுகளில் சில தவறுகள் இருக்கலாம். அதனை பக்குவமாக புரியவைக்க வேண்டுமே தவிர, குடும்பத்தினர், மற்றவர்கள் முன்னிலையிலோ, பொது வெளியிலோ திட்டக்கூடாது.

அப்படி பிறர் முன்பு திட்டுவது மகளுக்கு அவமானத்தையும், தாழ்வு மனப்பான்மையும் உண்டாகிவிடும். தாய்-மகள் உறவில் விரிசல் ஏற்படவும் காரணமாகிவிடும்.

* மகளின் படிப்பு விஷயத்திலும் கடுமை கொள்ளக்கூடாது. மற்றவர்களுடன் ஒப்பிடுவதோ, மற்றவர்களிடம் பகிர்ந்து கொள்வதோ கூடாது. 'உன் மகளுடன் ஒப்பிடும்போது என் மகள் படிப்பில் சுமார்தான்' என்ற ரீதியில் பேசக்கூடாது.

மகளின் குறைகளை அவரிடமே நேரில் சுட்டிக்காட்டி திருத்துவதற்கு முயற்சி செய்ய வேண்டுமே தவிர கடுமையாக நடந்து கொள்ளக்கூடாது.

* அன்பு, தியாகம், பணிவு, இரக்கம், உதவும் மனப்பான்மை உள்ளிட்ட அனைத்து குணாதிசயங்களையும் கொண்டவராக மகளை வளர்த்தெடுக்கும் பொறுப்பு தாய்க்கு உண்டு.

அதேவேளையில் சூழ்நிலைக்கு ஏற்ப குணாதிசயங்களை வெளிப்படுத்தும் பக்குவம் கொண்டவராகவும் மகளை வளர்த்தெடுக்க வேண்டும்.

* மகளின் திருமணம் விமரிசையாக நடைபெற வேண்டும் என்ற விருப்பம் ஒவ்வொரு தாய்மார்களிடமும் இருக்கும். அதே எதிர்பார்ப்பும், ஆர்வமும் மகளிடமும் வெளிப்படும் என்பதையும் புரிந்து கொள்ள வேண்டும். மகளின் விருப்பங்களை நிறைவேற்றுவதற்கு முயற்சிக்க வேண்டுமே தவிர முட்டுக்கட்டை போடக்கூடாது.

நடைமுறைக்கு சாத்தியமில்லாத விஷயங்களை பக்குவமாக விளக்கி புரிய வைக்க வேண்டும். ஒருவேளை மகளுக்கு திருமணத்தில் நாட்டம் இல்லை என்றால், அதற்கான சூழல் உருவாகும் வரை அமைதி காக்க வேண்டும்.

கருவிலுள்ள குழந்தையை சுற்றியுள்ள நீரையே நாம் பனிக்குட நீர் என்கிறோம். இந்த நீர் வற்றிப்போகும் நிலையை `ஆலிகோஹைட்ராமினியாஸ்' (Oligohydramnios) என்கிறோம்.

குழந்தையின் சிறுநீரகங்கள், 16 வாரங்களுக்குப் பிறகு, சிறுநீரை உற்பத்தி செய்யத் தொடங்கும். இந்த பனிக்குட நீரானது தாயின் ரத்தம் மற்றும் கருவிலுள்ள சிசுவின் சிறுநீர் இரண்டும் சேர்ந்து உருவாவது.

பனிக்குட நீரானது, குழந்தையை தொற்றுகளிலிருந்து காப்பாற்றுகிறது. வெளிப்புற அதிர்ச்சி உள்ளிட்டவற்றிலிருந்தும் கருவிலுள்ள குழந்தையைப் பாதுகாக்கிறது. குழந்தையின் சுதந்திரமான அசைவுக்கும் உதவுகிறது.

கர்ப்ப காலத்தில் ஒரு பெண் பனிக்குட நீரை சரியான அளவில் வைத்திருந்து பிரசவக்காலம் நெருங்கும் போது நீரின் அளவு குறைந்தால் அதுவும் சிக்கலே.

அப்போது கர்ப்பபைக்கு செயற்கையாக நீரை ஏற்றி சுகப்பிரசவத்துக்கு முயற்சி செய்வார்கள். அரிதாக சில குழந்தைகள் மலம் கழித்துவிடக்கூடும்.

எனினும் குழந்தை மலத்தை விழுங்காமல் இருக்க இந்த அம்னியா இன்ஃப்யூஷன் செய்வதன் மூலம் தடுக்கலாம். இந்நிலையிலும் சிக்கல் தொடர்ந்தால் பாதுகாப்பான தாய் சேய் ஆரோக்கியத்துக்கு சிசேரியன் செய்வதற்கு மருத்துவர்கள் ஆலோசனை வழங்குவார்கள்.

ஏனெனில் இது குழந்தைக்கு மூச்சுத்திணறலை உண்டாக்கும். சில பெண்கள் பனிக்குட நீர் வெளியேறுதலை சிறுநீர் கழிவதாக நினைத்து முழு நீரும் வெளியேறிய பிறகு வருவார்கள்.

இவர்களுக்கு உடனடி சிசேரியன் அவசியமாகிறது. இந்த பனிக்குட நீர் குறைவாக பெற்றுள்ள குழந்தைகள் பிறந்த பிறகு அவர்களது நுரையீரல் வளர்ச்சி, சிறுநீரகம், மலம் போன்ற இயற்கை உபாதைகள் சீராக இருக்கிறதா என்ற பரிசோதனையும் செய்யப்படும்

பனிக்குட நீர் குறைந்தால் என்ன செய்ய வேண்டும்?

பனிக்குட நீர் குறைந்தால் மருத்துவர் சில வழிமுறைகளை பரிந்துரைப்பார்.

பெண்கள் தண்ணீர் குடிப்பதை அதிகரிக்க செய்ய வேண்டும். கர்ப்பகாலத்தில் பனிக்குட நீர் குறைவாக கொண்டிருந்த பெண்கள் சிகிச்சையில் தண்ணீர் அதிகமாக குடித்த பெண்களை ஆய்வு செய்ததில் அவர்களது அம்னோடிக் திரவம் அதிகரித்தது கண்டறியப்பட்டது. இவர்கள் அதிக உடல் உழைப்பில்லாமல் சில காலம் ஓய்வில் இருக்க வேண்டும்.

பனிக்குட நீர் அதிகரிக்கும் வரை உடல் செயல்பாடுகலை குறைக்க மருத்துவர் அறிவுறுத்துவர். அம்னியோஇன்ஃப்யூஷன் எனப்படும் செயல்முறையுடன் குறைந்த அளவு அம்னோடிக் திரவத்துக்கு சிகிச்சையளிக்கலாம்.

இந்த சிகிச்சைக்கு திரவ அளவை அதிகரிக்க மருத்துவர் கருப்பை வாய் வழியாக அம்னோடிக் சாக்கில் உப்பு கரைசலை அறிமுகப்படுத்துவார்.

கர்ப்பத்தின் இறுதி கட்டங்களில் அம்னோடிக் திரவம் மிக குறைவாக இருந்தால் மருத்துவர்கள் பிரசவத்தை பரிந்துரைக்கலாம். இதனால் பிரசவத்தின் போது ஏற்படக்கூடிய சிக்கல்களை தடுக்க உதவும்.

ஒரு பெண் முதல்முறை கருத்தரிக்கும் போது கர்ப்பகால உடல் மாற்றம், உடலில் உண்டாகும் அறிகுறிகள், கவனமாக இருக்க வேண்டிய அறிகுறிகள் என அனைத்தையும் குறித்து மருத்துவர்களிடம் ஆலோசனை பெறுவது அவசியம்.

குறிப்பிட்ட மாதங்களுக்கு மேல் குழந்தையின் அசைவு உணர்வீர்கள். குழந்தையின் அசைவு குறித்தும் விழிப்புணர்வு வேண்டும்.

ஏனெனில் ஸ்கேன் பரிசோதனை தவிர்த்து குழந்தையின் அசைவை கொண்டு தான் பனிக்குட நீர் குறைவதை கண்டறியமுடியும் என்பதால் ஒவ்வொரு விஷயங்களிலும் கர்ப்பிணி எச்சரிக்கையாக இருக்க வேண்டும். 

கர்ப்பத்தின் ஆரம்ப கால ஸ்கேன்களில் பனிக்குட நீர் குறைவதை எளிதாக கண்டறியலாம். ஒருவேளை பனிக்குட நீர் குறைபாடு கண்டறியப்பட்டால் குரோமோசோமல் பரிசோதனை செய்ய வேண்டும்.

அப்போது இந்த பிரச்சனையின் தீவிரத்தையும், அதை சரிசெய்ய முடியுமா என்பதையும் மருத்துவர்கள் பரிசோதனை செய்வார்கள்.

கர்ப்பத்தின் ஆரம்ப கட்டம் என்றால் அதை பொறுத்து கர்ப்பத்தை தொடர்வதா வேண்டாமா என்று முடிவு செய்வார்கள். பெண்ணின் ஆறாம் மாதத்தில் குழந்தையின் அனாடமியை பரிசோதிப்பார்கள்.

அப்போது பனிக்குட நீரின் அளவு, நஞ்சுக்கொடி, குழந்தைக்கு போதுமான ரத்த ஓட்டம் கிடைக்கிறதா, ஆக்சிஜன் தேவையான அளவு கிடைக்கிறதா என்பதையும் பரிசோதிப்பார்கள். குறிப்பாக கர்ப்பிணியின் கடைசி மூன்றாம் மாதத்தில் பரிசோதனை செய்யப்படும்.

பனிக்குட நீர் குறைவதற்கு காரணம்:

ஒரு பெண்ணின் கர்ப்பத்தின் ஆரம்ப காலத்தில் பனிக்குட நீர் பற்றாக்குறையால் உண்டாகும் பல பிரச்சனைகள் சரி செய்யகூடியவை தான். குரோமோசோம் குறைபாடு காரணமாக சில குழந்தைகளுக்கு இப்பிரச்சனை உண்டாகலாம்.

நஞ்சுக்கொடி வழியாக குழந்தைக்கு ரத்த ஓட்டம் குறையும் போதும், குழந்தைக்கு சிறுநீரக வளர்ச்சி குறைபாடு இருந்தாலும் பனிக்குட நீர் குறையலாம்.

நஞ்சுக்கொடி சரியான நிலையில் இல்லாமல் கர்ப்பப்பை ஒட்டி இருந்தாலும் பனிக்குட நீர் அளவு மாறுபடலாம். பெண்ணுக்கு கர்ப்பப்பை காலம் தாண்டி பிரசவக்காலம் நெருங்கும் போது பிரசவ தேதி கடந்தால் அப்போது பனிக்குட நீர் குறையத் தொடங்கும்.

குழந்தையை தாண்டி தாய்க்கு ஏதேனும் கர்ப்பப்பையில் ஏற்படும் நோய்த்தொற்று ஒரு முக்கிய காரணம் ஆகும்.

கர்ப்பிணிக்கு கர்ப்பத்துக்கு முன்னரே அல்லது கர்ப்பகாலத்தில் ரத்த அழுத்தம், சிறுநீரக பிரச்சனைகள் போன்றவையும் காரணமாக இருக்கலாம்.

தாயால் குழந்தைக்கு பனிக்குட நீர் பிரச்சனை ஏற்பட்டால் அடுத்து கருத்தரிக்கும் போதும் இந்த பிரச்சனை உண்டாகலாம்.

பனிக்குட நீர் குறைவதை கர்ப்பிணிகளால் கண்டறிய முடியுமா?

கர்ப்பிணிக்கு குறிப்பிட்ட மாதத்தில் குழந்தையின் அசைவு நன்றாக உணர முடியும். பனிக்குட நீர் குறைவதற்கான அறிகுறிகள் என்றால் அதில் முக்கியமானது குழந்தையின் அசைவு தெரியாமல் உணர்வதுதான்.

குழந்தையின் அசைவை உணர்ந்த பெண்கள் திடீரென்று குழந்தையின் அசைவை உணர முடியவில்லை என்று டாக்டரிடம் செல்வார்கள். நீரின் அளவு குறையும் போது பனிக்குட நீரில் மிதக்கும் குழந்தை கர்ப்பப்பையை சுற்றி வராமல் ஒரே இடத்தில் நின்று விடும்.

இந்நிலை கர்ப்பத்தின் இறுதி வாரங்களில் இருந்தால் குழந்தை தலைக்கீழாக அல்லது சில நேரங்களில் குறுக்கு நெடுக்காகவும் நின்றுவிடும். அப்போது தான் சிசேரியன் அவசியமாகிவிடுகிறது.