கேரளா

திருவனந்தபுரம்:

சபரிமலை ஐயப்பன் கோவிலுக்கு ஒவ்வொரு ஆண்டும் மண்டல மற்றும் மகரவிளக்கு பூஜை காலத்தில் லட்சக்கணக்கான பக்தர்கள் சாமி தரிசனம் செய்ய வருவார்கள். இந்த ஆண்டுக்கான மண்டல பூஜை தற்போது நடந்து வருவதால், தினமும் ஆயிரக்கணக்கான பக்தர்கள் அங்கு செல்கிறார்கள்.

ஒவ்வொரு ஆண்டும் கார்த்திகை மாதத்தில் மழை மற்றும் குளிர் அதிகமாக இருக்கும். அதேபோன்று தான் இந்த ஆண்டும் கார்த்திகை மாதம் தொடங்கியதில் இருந்தே சபரிமலையில் மழை மற்றும் பனி அதிகமாக இருந்தது. அவற்றை பொருட்படுத்தாமல் சபரிமலைக்கு ஐயப்ப பக்தர்கள் வந்து சென்றனர்.

இந்தநிலையில் கடந்த சில நாட்களாக பகல் மற்றும் இரவு நேரத்தில் சீதோஷ்ண நிலை வெவ்வேறாக இருக்கிறது. அதாவது பகல் நேரத்தில் கடும் வெயிலும், மாலைக்கு பிறகு மூடு பனியும் நிலவுகிறது. இதன் காரணமாக பக்தர்களின் உடல்நிலை பாதிக்கப்படுகிறது.

காய்ச்சல் உள்ளிட்ட உபாதைகளால் சபரிமலைக்கு வரக்கூடிய பக்தர்கள் பாதிக்கப்படுகின்றனர். அதிலும் ஏராளமான பக்தர்கள் காய்ச்சல் பாதிப்புக்கு உள்ளாகி இருக்கின்றனர். கடந்த 22 நாட்களில் காய்ச்சலுக்கு 67 ஆயிரத்து 600 பேர் சிகிச்சை பெற்றுள்ளனர்.

சபரிமலையில் நேற்று பக்தர்கள் கூட்டம் அதிகமாக இருந்தது. நேற்று 78 ஆயிரத்து 36 பேர் சாமி தரிசனம் செய்திருக்கின்றனர். அவர்களில் 14 ஆயிரத்து 660 பேர் ஸ்பாட் புக்கிங் செய்து சபரிமலைக்கு வந்திருக்கின்றனர்.

இன்று பக்தர்கள் கூட்டம் ஓரளவுக்கு அதிகமாக இருந்தது. ஒரு மணி நேரத்திற்கு 4,200 முதல் 4,300 பக்தர்கள் வரை மலையேறினர். பக்தர்கள் கூட்ட நெரிசலின்றி சாமி தரிசனம் செய்தார்கள்.

திருவனந்தபுரம்:

கேரள மாநிலத்தில் உள்ள 4 விமான நிலையங்களில் இருந்தும் பல்வேறு நாடுகளுக்கு விமானங்கள் இயக்கப்படுகின்றன. வெளிநாடுகளில் இருந்து கேரளாவுக்கு வரக்கூடிய விமானங்களில் பயணிகள் சிலர் சட்டவிரோத பொருட்களை கடத்திக் கொண்டு வருவது அதிகளவில் நடந்து வருகிறது.

அதனை தடுக்கும் வகையில் சுங்கத்துறையினர் தீவிர கண்காணிப்பில் ஈடுபட்டு வருகின்றனர். இதற்காக அவர்கள் பயணிகள் மற்றும் அவர்கள் கொண்டுவரும் உடமை களை தீவிரமாக சோதனை செய்வது வழக்கம்.

இந்த நிலையில் பாங்காங்கில் இருந்து கொச்சி வந்த விமானத்தில் கஞ்சா கடத்தப்படுவதாக சுங்கத்துறையினருக்கு ரகசிய தகவல் வந்தது.

அதன் பேரில் கொச்சி விமான நிலையத்திற்கு பாங்காங்கில் இருந்து வந்த விமானத்தில் பயணித்து வந்த விமானிகளிடம் சோதனை நடத்தப்பட்டது. மேலும் அவர்களது உடமைகளும் சோதனைக்குள்ளாக்கப்பட்டன.

அப்போது மலப்புரத்தை சேர்ந்த உஸ்மான் என்பவர் தனது டிராலி பேக்கினுள் தின்பண்டங்களுக்கு மத்தியில் கலப்பின கஞ்சாவை மறைத்து வைத்து கொண்டு வந்தது கண்டுபிடிக்கப் பட்டது.

13 கிலோ எடையுள்ள அந்த கலப்பின கஞ்சா இரண்டு பாக்கெட்டுகளில் வைக்கப்பட்டிருந்தன. அவற்றின் மதிப்பு ரூ.3 கோடியே 50 லட்சம் ஆகும். அதனை அவர் தாய்லாந்தில் இருந்து கடத்தி கொண்டு வந்திருப்பது விசாரணையில் தெரியவந்தது.

இதையடுத்து உஸ்மானை சுங்கத் துறையினர் கைது செய்தனர். அவரிடமிருந்த கஞ்சா பறிமுதல் செய்யப்பட்டது. 

திருவனந்தபுரம்:

சபரிமலை ஐயப்பன் கோவிலுக்கு ஒவ்வொரு ஆண்டும் மண்டல மற்றும் மகரவிளக்கு பூஜை காலத்தில் லட்சக்கணக்கான பக்தர்கள் சாமி தரிசனம் செய்ய வருவார்கள்.

இந்த ஆண்டுக்கான மணடல பூஜை தற்போது நடந்து வருவதால், தினமும் ஆயிரக்கணக்கான பக்தர்கள் அங்கு செல்கிறார்கள்.

சபரிமலைக்கு 10 வயதுக்கு மேற்பட்ட மற்றும் 50 வயதுக்கு குறைந்த பெண்கள் செல்ல முடியாது. 50 வயதுக்கு மேற்பட்ட பெண்களே சபரிமலைக்கு செல்ல முடியும். இதனால் வெளிமாநிலங்களில் இருந்து ஐயப்ப பக்தர்களுடன் வரக்கூடிய பெண்கள், தங்கும் வகையில் தங்குமிடம் அமைக்க வேண்டும் என்ற கோரிக்கை பல ஆண்டுகளாக இருந்து வந்தது.

பெண்களுக்கு பாதுகாப்பான ஓய்வு மையம் அமைக்க நடவடிக்கை எடுக்க வேண்டும் என்ற கோரிக்கையை போலீசாரும் முன்வைத்திருந்தனர்.

இதையடுத்து பம்பையில் பெண்களுக்கான ஓய்வு மையம் அமைக்க தேவசம்போர்டு நடவடிக்கை எடுத்தது.

அதன்படி ஐயப்ப பக்தர்களுடன் வரக்கூடிய பெண்கள் தங்குவதற்காக சிறப்பு மையம் பம்பை கணபதி கோவில் அருகே அமைக்கப்பட்டது. இதன் திறப்பு விழா நேற்று நடைபெற்றது. இந்த விழாவில் பம்பை தனி அலுவலர் ஜெயசங்கர் மற்றும் அதிகாரிகள் கலந்துகொண்டனர்.

1000 சதுரஅடி பரப்பளவில் அமைக்கப்பட்டிருக்கும் இந்த மையத்தில் ஒரே நேரத்தில் 50 பெண்கள் தங்கலாம். இந்த மையம் குளிர்சாதன வசதி செய்யப்பட்டதாகும்.

சபரிமலைக்கு செல்லும் ஐயப்ப பக்தர்களுடன் வந்திருக்கும் குறைந்த வயது பெண்கள் இந்த மையத்தில் வசதியாகவும், பாதுகாப்பாகவும் ஓய்வெடுக்க முடியும் என்று தெரிவிக்கப்பட்டுள்ளது.

சபரிமலைக்கு வரக் கூடிய குழந்தைகளின் தாய் மார்களும் இந்த வசதியை பயன்படுத்திக் கொள்ளலாம் என தெரிவிக்கப்பட்டுள்ளது. இந்த மையத்தில் ஓய்வு அறை, உணவளிக்கும் அறை மற்றும் கழிப்பறை உள்ளிட்டவைகள் இடம்பெற்றுள்ளன.

2019ம் ஆண்டு மக்களவை தேர்தலுக்கு முன்பாக மத்திய அரசு இட ஒதுக்கீட்டில் முக்கிய திருத்தத்தைக் கொண்டுவந்தது. சமூகத்தால் பிற்படுத்தப்பட்டவர்களுக்கு இட ஒதுக்கீடு வழங்குவதைப் போல் பொருளாதாரத்தால் பின் தங்கிய உயர் வகுப்பினருக்கு இட ஒதுக்கீடு வழங்க மத்திய அரசு சட்டத்தைத் திருத்தம் செய்தது.

இதன் மூலம், பொருளாதாரத்தில் பின் தங்கிய உயர் வகுப்பினருக்கு 10% இட ஒதுக்கீடு வழங்கப்படும் என்று அறிவிக்கப்பட்டது.

மத்திய அரசின் அறிவிப்புக்கு எதிராக உச்சநீதிமன்றத்தில் தொடரப்பட்ட வழக்குகளை அப்போதைய தலைமை நீதிபதி யு.யு.லலித், நீதிபதிகள் தினேஷ் மகேஸ்வரி, பேலா திரிவேதி, பி.பர்திவாலா, ரவீந்திர பட் ஆகிய 5 பேர் கொண்ட அமர்வு விசாரித்தது.

இந்த வழக்கில் கடந்த 2022ம் ஆண்டு நவம்பர் மாதம் வழங்கப்பட்ட தீர்ப்பில் நீதிபதிகள் தினேஷ் மகேஸ்வரி, பேலா திரிவேதி, பி.பர்திவாலா ஆகியோர் மத்திய அரசின் 10 சதவீத இட ஒதுக்கீடு செல்லும் என்றும் தலைமை நீதிபதி யு.யு. லலித் மற்றும் நீதிபதி ரவீந்திர பட் ஆகிய 10 சதவீத இட ஒதுக்கீடு செல்லாது என்றும் தீர்ப்பளித்தனர்.

5 இல் 3 நீதிபதிகள் ஆதரித்து தீர்ப்பளித்ததால் 10 சதவீத இட ஒதுக்கீடு செல்லுபடியாகும் என்று முடிவில் தீர்ப்பானது. தற்போதுவரை இந்த இடஒதுக்கீடு நடைமுறையில் உள்ளது. இந்த இடஒதுக்கீட்டை ஏற்கமாட்டோம் என்று தமிழ்நாடு அரசு அறிவித்திருந்தது.

இந்நிலையில் இன்று கேரள உயர்நீதிமன்றத்தில் நடந்த மறைந்த நீதிபதி வி.ஆர். கிருஷ்ண ஐயரின் 10ம் ஆண்டு நினைவு கூட்டத்தில் பங்கேற்று பேசிய உச்சநீதிமன்ற முன்னாள் நீதிபதி ரோகிண்டன் நாரிமன் கருத்து ஒன்றை தெரிவித்துள்ளார்.

நிகழ்ச்சியில் பேசிய அவர், இட ஒதுக்கீடு என்பது வரலாற்று ரீதியாக சமூக ஒடுக்குமுறைகளுக்கு உள்ளானவர்களுக்காக கொண்டுவரப்பட்டது.

உயர்வகுப்பினருக்கான 10% இட ஒதுக்கீடு வழக்கில் உச்சநீதிமன்றம் வழங்கிய தீர்ப்பு அரசியல் சாசனத்திற்கு எதிரானது, தார்மீக ரீதியாகவும் தவறானது. இந்த இட ஒதுக்கீட்டை பெறுவோர் வரலாற்று ரீதியாக எந்த ஒடுக்குமுறைக்கும் ஆளானது கிடையாது என்று தெரிவித்துள்ளார். 

சபரிமலை:

மண்டல பூஜையை முன்னிட்டு சபரிமலை ஐயப்பன் கோவிலில் கடந்த மாதம் 15-ந்தேதி நடை திறக்கப்பட்டது. 16-ந்தேதி முதல் வழக்கமான பூஜைகளுடன் சிறப்பு வாய்ந்த நெய்யபிஷேகம் உள்பட சிறப்பு பூஜைகள், அபிஷேகம் ஆகியவை நடந்து வருகிறது. கோவிலில் இந்த ஆண்டின் மண்டல பூஜை வருகிற 26-ந்தேதி நடக்கிறது. மண்டல பூஜையின் முன்னோடியாக 25-ந்தேதி மாலையில் தங்க அங்கி அணிவித்து சிறப்பு தீபாராதனை நடைபெறும்.

இதற்கான தங்க அங்கி ஆரன்முளா பார்த்தசாரதி கோவிலில் இருந்து 22-ந்தேதி ஊர்வலமாக பலத்த பாதுகாப்புடன் கொண்டு வரப்படுகிறது. 26-ந்தேதி மண்டல பூஜைக்கு பின் அன்று இரவு கோவில் நடை அடைக்கப்படும். பின்னர் மகரவிளக்கு பூஜைகளுக்காக டிசம்பர் 30-ந்தேதி மாலையில் நடை திறக்கப்படும்.

இந்தநிலையில் சீசனை முன்னிட்டு ஏராளமான பக்தர்கள் ஆன்லைன் மூலம் முன்பதிவு செய்தும், உடனடி முன்பதிவு செய்தும் சாமி தரிசனம் செய்து வருகிறார்கள். இதையொட்டி சபரிமலையில் பக்தர்கள் கூட்டம் நாளுக்கு நாள் அதிகரித்து வருகிறது. நேற்று வரை 16.25 லட்சம் பக்தர்கள் சாமி தரிசனம் செய்து உள்ளனர். இது கடந்த ஆண்டை விட 4 லட்சம் அதிகமாகும். இதனிடையே நேற்று சபரிமலையில் பக்தர்கள் கூட்டம் அலைமோதியது.

மழை காரணமாக ஏராளமான ரெயில்கள் ரத்தானது. இதனால் ஐயப்ப பக்தர்களின் சபரிமலை பயணமும் எதிர்பாராதவிதமாக ரத்துசெய்யப்பட வேண்டிய நிலை ஏற்பட்டது. தற்போது ரெயில் போக்குவரத்து சீராகி வரும் நிலையில் தென் மாநில பக்தர்களின் வருகை அதிகரித்து உள்ளது. கூட்ட நெருக்கடி காரணமாக பக்தர்கள் 10 மணிநேரம் வரை காத்திருந்து தரிசனம் செய்து வருகிறார்கள்.

கேரள மாநிலத்தின் வயநாடு மாவட்டத்தில் ஜூலை 30-ந்தேதி பெய்த கனமழை காரணமாக திடீரென நிலச்சரிவு ஏற்பட்டது. இந்த நிலச்சரிவில் சிக்கி 400-க்கும் அதிகமானோர் பரிதாபமாக உயிரிழந்தனர்.

முண்டகை, சூரல்மலை, மேம்பாடி, அட்டமலை, புஞ்சிரிமட்டம், வெள்ளரிமலை உள்ளிட்ட இடங்கள் கடுமையாக பாதிக்கப்பட்டன. அந்தப் பகுதியில் இருந்த நூற்றுக்கணக்கான வீடுகள் மற்றும் கட்டிடங்கள் மண்ணுக்குள் புதைந்தன. இதனால் தரைவழி துண்டிக்கப்பட்டதால் மாநில பேரிடர் குழு, தேசிய பேரிடர் குழு, இந்திய ராணுவ விமானங்கள் மீட்பு பணியில் ஈடுபட்டனர்.

இந்த நிலச்சரிவால் கேரள மட்டுமின்றி, ஒட்டுமொத்த நாடும் கடும் துயரத்திற்கு உள்ளானது. இதனிடையே வயநாடு நிலச்சரிவு ஏற்படுத்திய சோகத்தால் கேரளாவில் ஓணம் கொண்டாட்டம் ரத்து செய்யப்பட்டது.

வயநாடு நிலச்சரிவில் பாதிக்கப்பட்டவர்களுக்காக பல்வேறு மாநில அரசுகள் நிதியுதவிகளை அளித்தன. தமிழ்நாடு அரசு சார்பில் 5 கோடி ரூபாய் நிதியுதவி அளிக்கப்பட்டது.

இதனிடையே, நாட்டையே உலுக்கிய இந்த நிலச்சரிவு பாதிப்பை தேசியப் பேரிடராக அறிவிப்பதோடு ரூ.2000 கோடி சிறப்பு நிதி தொகுப்பை உடனடியாக வழங்க வேண்டும் எனறு பிரதமர் மோடிக்கு கேரள மாநில அரசு கடிதம் எழுதியிருந்தது.

இந்த கடிதத்திற்கு மத்திய அரசிடம் இருந்து வந்த பதில் கடிதத்தில், நாட்டில் எந்தவொரு பேரிடரையும் தேசியப்பேரிடராக அறிவிக்க தற்போதுள்ள மாநில பேரிடர் மேலாண்மை நிதி மற்றும் தேசிய பேரிடர் மேலாண்மை நிதியின் விதிமுறைகளில் இடமில்லை.

மாநில பேரிடர் மேலாண்மை நிதியின் கீழ் 2024-25ம் ஆண்டில் கேரள அரசுக்கு ரூ.388 கோடி ஒதுக்கப்பட்டது. இதில் மத்திய அரசின் பங்களிப்பான ரூ.291 கோடி இரு தவணைகளாக விடுவிக்கப்பட்டது. நிவாரணப் பணிகளை மேற்கொள்ள கேரளத்திடம் போதிய நிதி கையிருப்பு உள்ளது' என்று தெரிவித்து இருந்தது.

இந்த நிலச்சரிவு மீட்புப் பணிகள் மற்றும் நிவாரணத்திற்கு கூடுதல் நிதி தேவைப்படும் என்பதால் மத்திய அரசு ஆண்டு தோறும் வழங்கும் பேரிடர் நிவாரண நிதியை அதிகரித்து வழங்க வேண்டும் என்று கேரள அரசு கேட்டுக்கொண்டு நிலையில், மத்திய அரசு எந்த கூடுதல் நிதியையும் வழங்காமல் நிலச்சரிவின் போது இந்திய ராணுவ ஹெலிகாப்டர் மூலம் மீட்புப்பணிகள் மேற்காண்டதற்காக கேரள மாநிலத்து வழங்க வேண்டிய பேரிடர் நிதியில் இருந்து ரூ.153 கோடியை மத்திய அரசு பிடித்தம் செய்துள்ளது அதிர்ச்சியை ஏற்படுத்தி உள்ளது. 

திருவனந்தபுரம்:

சபரிமலையில் அனைத்து பக்தர்களும் சமம் என்ற நிலையில் வி.ஐ.பி. தரிசனத்திற்கு அனுமதி இல்லை.

இந்தநிலையில் நேற்று முன்தினம் சபரிமலை சென்ற நடிகர் திலீப் போலீஸ் பாதுகாப்புடன் சாமி தரிசனம் செய்தார். மேலும் இரவு நடை அடைக்கும்போது பாடப்படும் அரிவராசனம் முடியும் வரை நடிகர் திலீப் சாமி தரிசனத்திற்கு அனுமதிக்கப்பட்டதாக பரபரப்பு குற்றச்சாட்டு எழுந்தது.

இந்தநிலையில் இச்சம்பவம் குறித்து நேற்று கேரள ஐகோர்ட்டின் தேவஸ்தான சிறப்பு அமர்வு விசாரணை நடத்தியது. அப்போது போலீஸ் பாதுகாப்புடன் நடிகர் திலீப் சன்னிதானத்திற்கு வந்தது எப்படி? என கேள்வி எழுப்பிய சிறப்பு அமர்வு நீதிபதிகள், அரிவராசனம் பாடல் முடியும் வரை நடிகர் திலீப்பிற்கு சன்னிதானத்தில் வி.ஐ.பி. தரிசனத்திற்கு அனுமதி கிடைத்தது எப்படி? என்ற கேள்வியையும் எழுப்பினர்.

இந்த விஷயத்தை சாதாரணமாக எடுத்துக் கொள்ள முடியாது எனவும் நீதிபதிகள் தெரிவித்தனர்.

இதை தொடர்ந்து சம்பவம் குறித்து தேவஸ்தான ஊழியர்களிடம் விளக்கம் கேட்டு இருப்பதாக தேவஸ்தானம் சார்பில் கோா்ட்டில் ஆஜரான வக்கீல் தெரிவித்தார்.

கேரள மாநிலம் இடுக்கி மாவட்டம் மூணாறு அருகே இடமலைக்குடி என்ற மலைக்கிராமம் உள்ளது. மூணாறில் இருந்து, சுமார் 30 கிலோமீட்டர் தூரத்தில் அந்த கிராமம் இருக்கிறது.

இந்தியாவிலேயே பழங்குடியின மக்களுக்கு என்று உருவாக்கப்பட்ட ஒரே பஞ்சாயத்து இது. 6 மலைக்கிராமங்கள், 13 வார்டுகளை கொண்டது. இங்கு 1,200-க் கும் மேற்பட்ட மக்கள் வசித்து வருகின்றனர்.

விவசாயம் மற்றும் விவசாயம் சார்ந்த தொழிலில் இவர்கள் ஈடுபட்டு வருகின்றனர். இங்கு வசிக்கிற பழங்குடியின மக்களுக்கு கேரள அரசு சார்பில், மாதந்தோறும் 5½ டன் ரேஷன் அரிசி வினியோகம் செய்யப்பட்டு வருகிறது.

இந்தநிலையில் கடந்த 20 நாட்களாக, இடமலைக்குடி கிராம மக்களுக்கு ரேஷன் அரிசி வினியோகம் செய்யப்படவில்லை. இது பற்றி மாவட்ட நிர்வாகத்துக்கு புகார் வந்தது. அரிசி ஏன் இன்னமும் வினியோகிக்கப்படவில்லை என்று அதிகாரிகள் விசாரித்தனர்.

அப்போது அரிசி இல்லை என்பது தெரியவந்தது. அப்படி என்றால் அங்கே இருந்த 5½ டன் அரிசி எங்கே போனது? என்ற கேள்வி எழுந்தது.

பழங்குடியின மக்களுக்கு ஒவ்வொரு மாதமும் வழங்கப்படுகிற ரேஷன் அரிசி மூட்டை, மூட்டையாக இடமலைக்குடியில் உள்ள கூட்டுறவு சங்க குடோனில் அடுக்கி வைக்கப்படுவது வழக்கம். அங்கிருந்து மக்களுக்கு வினியோகம் செய்யப்படுவது வழக்கம்.

எனவே அந்த குடோனுக்கு நேரடியாக சென்று, அங்கிருந்த ஊழியர்களிடம் வழங்கல் துறையினர் விசாரணை நடத்தினர்.

அப்போது அவர்கள் சொன்ன தகவல் அதிகாரிகளை அதிர்ச்சியிலும், ஆச்சரியத்திலும் ஆழ்த்தியது. அதாவது பழங்குடியின மக்களுக்காக வைக்கப்பட்டிருந்த 5½ டன் ரேஷன் அரிசியை எலிகள் தின்று விட்டதாக குண்டை தூக்கி போட்டனர். குடோன் ஊழியர்களின் இந்த பதில், வழங்கல்துறையினரை நிலைதடுமாற செய்து விட்டது.

டன் கணக்கில் ரேஷன் அரிசியை எலிகள் எப்படி தின்று அழிக்கும் என்ற கேள்வி எல்லோருடைய மனதிலும் எழுகிறது. இது, கேரள மாநில வழங்கல்துறையினரை மட்டுமின்றி மக்கள் மத்தியிலும் பரபரப்பை ஏற்படுத்தி இருக்கிறது.

இதற்கிடையே ரேஷன் அரிசி மாயமான விவகாரம் குறித்து விரிவான அறிக்கை தாக்கல் செய்ய உத்தரவு பிறப்பிக்கப்பட்டது. அதேநேரத்தில், திருட்டுத்தனமாக வெளி மார்க்கெட்டில் ரேஷன் அரிசி கடத்தி விற்கப்பட்டிருக்கலாம் என்ற சந்தேகம் வழங்கல் துறையினருக்கு ஏற்பட்டுள்ளது. இதுதொடர்பாக குடோன் பொறுப்பாளர்களிடம் விசாரணை நடத்தப்பட்டு வருவதாக வழங்கல்துறையினர் தெரிவித்தனர்.

எலிகள் தின்று இருக்கலாம் என்றாலும் 5½ டன் ரேஷன் அரிசியையும் தின்று இருப்பதாக எலிகள் மீது குற்றம் சுமத்துவது ஏற்புடையதாக இல்லை. உண்மையாக தின்றவர்களை உடனடியாக கண்டறிய வேண்டும் என்று அங்குள்ள மக்கள் சொல்கிறார்கள்.

திருவனந்தபுரம்:

கேரள மாநிலத்தின் வயநாடு மாவட்டத்தில் ஜூலை 30-ம் தேதி பெய்த கனமழை காரணமாக திடீரென நிலச்சரிவு ஏற்பட்டது. இந்த நிலச்சரிவில் சிக்கி 400-க்கும் அதிகமானோர் பரிதாபமாக உயிரிழந்தனர்.

முண்டகை, சூரல்மலை, மேம்பாடி, அட்டமலை, புஞ்சிரிமட்டம், வெள்ளரிமலை உள்ளிட்ட இடங்கள் கடுமையாக பாதிக்கப்பட்டன. அந்தப் பகுதியில் இருந்த நூற்றுக்கணக்கான வீடுகள் மற்றும் கட்டிடங்கள் மண்ணுக்குள் புதைந்தன.

இந்த நிலச்சரிவால் கேரள மட்டுமின்றி, ஒட்டுமொத்த நாடும் கடும் துயரத்திற்கு உள்ளானது.

வயநாடு நிலச்சரிவில் பாதிக்கப்பட்டவர்களுக்காக பல்வேறு மாநில அரசுகள் நிதியுதவிகளை அளித்தன. தமிழ்நாடு அரசு சார்பில் 5 கோடி ரூபாய் நிதியுதவி அளிக்கப்பட்டது.

வயநாடு நிலச்சரிவு ஏற்படுத்திய சோகத்தால் கேரளாவில் ஓணம் கொண்டாட்டத்தை ரத்துசெய்து மாநில முதல் மந்திரி பினராயி விஜயன் உத்தரவிட்டார் என்பது குறிப்பிடத்தக்கது.

திருவனந்தபுரம்:

சபரிமலையில் மண்டல பூஜைக்காக நடை திறக்கப்பட்டு பூஜைகள், வழிபாடுகள் நடந்து வருகிறது. இந்தநிலையில் டோலி தொழிலாளர்கள் அய்யப்ப பக்தர்களிடம் அதிக கட்டணம் வசூலிப்பதாக புகார் எழுந்தது. இதைதொடர்ந்து டோலி சேவைக்கு முன்கூட்டியே பணத்தை செலுத்தும் (பிரீபெய்டு) வசதியை ஏற்படுத்த போவதாக தேவஸ்தானம் அறிவித்தது.

இதை கண்டித்து சபரிமலையில் நேற்று முன்தினம் 1,500-க்கும் மேற்பட்ட டோலி தொழிலாளர்கள் வேலைநிறுத்த போராட்டத்தில் ஈடுபட்டனர். இதனால் வயதான மற்றும் உடல் நலம் குன்றிய அய்யப்ப பக்தர்கள் பெரிதும் பாதிக்கப்பட்டனர். பின்னர் டோலி தொழிலாளர்களுடன் அதிகாரிகள் பேச்சுவார்த்தை நடத்தினர். இதைத்தொடர்ந்து வேலை நிறுத்த போராட்டம் திரும்ப பெறப்பட்டது.

இந்தநிலையில் இந்த போராட்ட பிரச்சினை தொடர்பாக கேரள ஐகோர்ட்டின் தேவஸ்தான சிறப்பு அமர்வு விவாதித்தது. இதுதொடர்பாக கோர்ட்டு வெளியிட்டுள்ள தடை உத்தரவில் கூறப்பட்டுள்ளதாவது:-

சபரிமலை ஆராதனைக்குரிய இடமாகும். எனவே இங்கு போராட்டங்கள் நடத்தக்கூடாது. அதனை அங்கீகரிக்க முடியாது. பம்பை, சபரிமலையில் போராட்டங்கள் நடத்த தடை விதிக்கப்படுகிறது. இதுபோன்ற நடவடிக்கைகள், பக்தர்களின் ஆராதனை உரிமையை பாதிக்கும் செயலாகும். டோலி தொழிலாளர்களுக்கு ஏதாவது பிரச்சினைகள் இருந்தால் சீசன் தொடங்குவதற்கு முன்னதாக பேசி தீர்த்து இருக்க வேண்டும். விரதம் இருந்து வரும் பக்தர்களிடம் விலை பேசுவது ஏற்புடையது அல்ல. பக்தர்களை அழைத்து செல்ல முடியாது என கூற டோலி தொழிலாளர்களுக்கு அதிகாரம் இல்லை. அதே போல் பக்தர்களை சுமந்து செல்லும் வழியில் அவர்களை நடுவழியில் இறக்கி வைத்து பணம் கேட்டு மிரட்டும் டோலி தொழிலாளர்கள் மீது நடவடிக்கை எடுக்கப்படும்.

இவ்வாறு அந்த உத்தரவில் கூறப்பட்டுள்ளது.

திருவனந்தபுரம்:

வங்கக் கடலில் உருவான ஃபெஞ்சல் புயல் புதுச்சேரி-மரக்காணம் இடையே கரையை கடந்தது. இதனால் சென்னை, விழுப்புரம், கடலூர் உள்ளிட்ட வடமாவட்டங்களிலும், புதுச்சேரியிலும் கனமழை கொட்டியது.

குறிப்பாக கடலூர், விழுப்புரம், கள்ளக்குறிச்சி ஆகிய மாவட்டங்களில் புயலின் கோரத்தாண்டவத்தால் அதி கனமழை கொட்டித் தீர்த்தது. இதனால் அந்த 3 மாவட்டங்களும் வெள்ளத்தில் மிதக்கின்றன.

திருவண்ணாமலை, கிருஷ்ணகிரி, சேலம் உள்ளிட்ட பல்வேறு மாவட்டங்களிலும் கனமழை கொட்டியதால், கடும் வெள்ளப் பெருக்கு ஏற்பட்டது. கனமழையால் திருவண்ணாமலையில் மண் சரிவு ஏற்பட்டதால் மலையடிவாரத்தில் இருந்த ஒரு வீட்டை மண் மூடியதில் அங்கிருந்த 7 பேர் உயிரோடு புதைந்து பலியானார்கள்.

இந்நிலையில், ஃபெஞ்சல் புயலால் பாதிக்கப்பட்டுள்ள தமிழகத்திற்கு உதவ கேரள அரசு தயாராக உள்ளது என முதல் மந்திரி பினராயி விஜயன் தெரிவித்துள்ளார்.

இதுதொடர்பாக, பினராயி விஜயன் வெளியிட்டுள்ள எக்ஸ் வலைதள செய்தியில், ஃபெஞ்சல் புயலால் ஏற்பட்ட பேரழிவில் இருந்து மீண்டு வரும் தமிழக மக்கள் மீதே எங்களது எண்ணங்கள் உள்ளன. இந்த சவாலான நேரத்தில் கேரளா அண்டை மாநிலங்களுடன் ஒற்றுமையாக நிற்கிறது. தேவையான எந்த உதவிகளையும் வழங்க கேரள அரசு தயாராக உள்ளது. ஒன்றாக இணைந்து வென்று வருவோம் என பதிவிட்டுள்ளார்.

திருவனந்தபுரம்:

கேரள மாநிலம் திருவனந்தபுரத்தில் ஆதரவற்ற குழந்தைகளை பராமரிக்கும் ஒரு காப்பகம் செயல்பட்டு வருகிறது. குழந்தைகள் நலக்குழு மூலமாக நடத்தப்பட்டு வரும் இந்த காப்பகத்தில் பெற்றோரை இழந்த இரண்டரை வயது பெண் குழந்தை மற்றும் ஒரு வயது ஆண் குழந்தை சேர்க்கப்பட்டிருந்தனர்.

இந்தநிலையில் சம்பவத்தன்று அந்த இரண்டரை வயது பெண் குழந்தை படுக்கையில் சிறுநீர் கழித்து விட்டதாக தெரிகிறது. இதனால் ஆத்திரமடைந்த அந்த காப்பகத்தின் காப்பாளரான அஜிதா என்ற பெண், குழந்தையின் பிறப்புறுப்பில் தாக்கி காயப்படுத்தி இருக்கிறார்.

மேலும் அங்கு பணிபுரியக்கூடிய மகேஸ்வரி, சிந்து ஆகிய 2 பெண்களும் பெண் குழந்தையை துஷ்பிரயோகம் செய்து துன்புறுத்தி உள்ளனர். இதனால் அந்த பெண் குழந்தை வலியால் துடித்தபடி இருந்துள்ளது. இந்த நிலையில் அந்த பெண் குழந்தையை காப்பக ஊழியர்கள் குளிக்க வைத்த போது, குழந்தை வலியால் பயங்கரமாக துடித்துள்ளது.

இதையடுத்து தைக்காடு அரசு ஆஸ்பத்திரிக்கு அழைத்துச் செல்லப்பட்டு குழந்தைக்கு சிகிச்சை அளிக்கப்பட்டது. அப்போது சிறுமியின் அந்தரங்க உறுப்பில் காயம் ஏற்பட்டிருப்பதை டாக்டர்கள் கண்டறிந்தனர். அதுகுறித்து குழந்தைகள் நலக்குழுவின் பொதுச்செயலாளரின் கவனத்துக்கு கொண்டு செல்லப்பட்டது.

அவர் அது பற்றி திருவனந்தபுரம் அருங்காட்சியக போலீசில் புகார் செய்தார். அதன்பேரில் போலீசார் விசாரணை நடத்தி இரண்டரை வயது பெண் குழந்தையை துன்புறுத்திய அஜிதா, மகேஸ்வரி, சிந்து ஆகிய 3 பேரையும் கைது செய்தனர்.